„Það er ekki enn búið að skila bílnum og enginn hefur haft samband við mig vegna málsins síðan þetta gerðist. Ég hef heldur ekki fengið neina greiðslu fyrir bílinn enn þá.“ Þetta segir eigandi bílaleigunnar sem Sigurður Kristinsson og Sunna Elvira Þorkelsdóttir leigðu Renault Megane-bifreið af í desember síðastliðnum. Eins og DV hefur áður greint frá var bílnum ekki skilað og ekki heldur greiðslu fyrir andvirði hans þegar bílaleigan gaf kost á því. Eigandinn sagðist ætla að kæra stuldinn til lögreglu.
Eigandinn segist ekki enn hafa kært stuldinn til lögreglu. „Ég er í Bretlandi eins og er og hef ekki tekið neina ákvörðun. Ég er nú að leita ráða um hvað sé best að gera í þessu máli.“ Þá segist hann heldur ekki vita hvort hvarf bílsins tengist þeim upplýsingum sem sjúkrahúsið, sem Sunna dvaldi á, veitti DV um að slys hennar væri skráð sem umferðarslys.