„Ég hló bara, hvað átti maður að gera?“ Sagði Roger Leirvik í samtali við Aftonbladet eftir undarlega flugferð á mánudaginn. Ásamt 33 öðrum farþegum ætlaði hann að fljúga frá Sundsvall, sem er norðan við Stokkhólm, til Gautaborgar á vesturströndinni. En þegar farþegarnir stigu út úr flugvélinni voru þeir ekki í Gautaborg. Í stað þess að fljúga um 600 km í suðvestur þá hafði vélinni verið flogið tæplega 400 km í norðaustur og lent í Luleå.
Flugvélin átti að fara í loftið klukkan 17 en seinkaði töluvert. Það var ekki fyrr en um klukkan 20 sem tilkynning birtist á skjám í flugstöðinni og farþegum var sagt að fara að útgönguhliði. Vélin fór síðan í loftið en flugferðin tók ekki ýkja langan tíma og skyndilega voru farþegarnir komnir til Luleå.
„Ég hugsaði með mér að þeir væru að hægja ansi snemma á vélinni.“
Sagði Leirvik.
Flugfélagið sem í hlut á, Nextjet, staðfesti að eitthvað hafi farið úr skorðum en gat ekki sagt nákvæmlega til um hvað. Talsmaður flugfélagsins sagði að það virtist sem einhverskonar samskiptavandamál hafi komið upp á milli flugfélagsins og flugvallarins í Sundsvall.
Mikil snjókoma var víða í Svíþjóð á mánudaginn og öllu flugi til Gautaborgar hafði verið aflýst. Vélin sem flutti farþegana 34 til Luleå átti því aldrei að fara til Gautaborgar en samt sem áður var farþegunum hleypt um borð og tilkynnt um brottför.
Talsmaður flugvallarins í Sundsvall sagði að þar á bæ hafi fólk ekki fengið að vita að vélin ætti að fara til Luleå í stað Gautaborgar.
Aðrir flugfarþegar áttu pantað far til Luleå en voru skildir eftir í Sundsvall en þeir fengu að vita klukkan 20.40 að flugi þeirra hefði verið aflýst.
Farþegarnir sem ætluðu til Luleå fengu því gistingu í Sundsvall en farþegarnir sem ætluðu til Gautaborgar fengu gistingu í Luleå.