„Ég fylltist ofboðslega miklu vonleysi, fannst þetta hryllingur, ég grét þegar ég fór frá fólkinu.“ Þetta sagði Berglind Soffía Blöndal í viðtali í Samfélaginu á Rás 2 en hún rannsakaði í meistararitgerð í næringarfræði næringarástand þrettán manns í sjálfstæðri búsetu sem lágu öll í skamman tíma á öldrunardeild Landspítalans. Niðurstöðurnar eru sláandi. Dæmi voru um að heldri maður væri með aðeins maltdós og lýsisflösku í ísskápnum. Allt var þetta fólk í sjálfstæðri búsetu og var meðalaldur 87 ár.
Berglind greindi frá því að gamla fólkið sem hleypti henni inn á heimili sitt væri að borða að meðaltali 760 hitaeiningar en sá sem minnst borðaði var að innbyrða 204 kaloríur á dag. Samkvæmt stöðlum Alþjóðaheilbrigðismálastofnunarinnar er allt undir 900 hitaeiningum svelti en fólk er talið þurfa 1800 til 2200 hitaeiningar á dag.
Þegar heldra fólk kemur heim af spítalanum eru oft lítil bjargráð og fólkið veikburða og jafnvel rúmliggjandi. Það treysti sér því ekki til að elda, hafa sig til né fara á salerni. Þeir sem sjá um heimahjúkrun, ef læknum finnst tilefni til, koma tvisvar á dag. Þeirra hlutverk er þó ekki að sjá um að gefa fólkinu að borða. Berglind greindi jafnframt frá því að það væri lítil sem engin eftirfylgni.
Þegar Berglind skoðaði í ísskáp gamla fólksins var niðurstaðan sláandi. 33 prósent matvara var útrunnin og 25 prósent með sjáanlega yfirborðsmyglu. Berglind sagði:
Ég fann svo til. Þetta er fólkið sem byggði upp þjóðina, sem eiga svo mikið þakklæti skilið frá okkur í samfélaginu.
„Einn einstaklingur hann átti engin börn, hafði aldrei átt börn, hafði aldrei átt konu, alger einstæðingur, og hann var rúmliggjandi og ég hef bara aldrei séð svona tóman ísskáp. Það var til ein maltdós og ein lýsisflaska.“
Berglind bendir á að börnin séu oft einu bjargráð fólksins og sjái um að versla. Taldi Berglind að það væri líklega á um tveggja vikna fresti en í mörgum tilvikum vildi heldra fólk ekki leggja það á börn sín að versla oftar og finnst það þá vera byrði á afkomendum sínum.
„Mér finnst heldur ekki sanngjarnt að aðstandendur eigi að taka byrðina á sig. Það skemmir sambandið á milli ef þú þarft að fara að taka yfir alla hlutina sem foreldrar þurfa á að halda.“
Þá greindi Berglind frá því að hæstu tekjur voru 189 þúsund sem einn einstaklingur hafði í laun. Taldi hann það duga sér en upplýsti að hann keypti ekki gjafir fyrir barnabörn né föt fyrir sjálfan sig og verslaði sjaldan mat. Aðspurð hvernig það hefði verið að ganga í gegnum þessa rannsókn sagði Berglind:
„Ég fylltist ofboðslega miklu vonleysi, fannst þetta hryllingur, ég grét þegar ég fór frá fólkinu. Ég fann svo til. Þetta er fólkið sem byggði upp þjóðina, sem eiga svo mikið þakklæti skilið frá okkur í samfélaginu. Það á að huga vel að þörfum þessa fólks. Það á enginn að þurfa að svelta á Íslandi.“