Það er óhætt að segja að mörgum Dönum hafi brugðið í brún í gær þegar fjölmiðlar skýrðu frá ákæru á hendur 47 ára starfsmanni á leikskóla í Glostrup á Sjálandi. Hann er ákærður fyrir kynferðisbrot gegn 28 börnum, þau yngstu voru 2 til 3 ára þegar brotin áttu sér stað. Samkvæmt ákærunni er maðurinn ákærður fyrir nauðganir og önnur kynferðisbrot á leikskólanum og í félagsheimili skáta í Brøndby.
Jótlandspósturinn segir að samkvæmt ákærunni þá hafi mörg brotanna átt sér stað á skiptiborðinu á leikskólanum, þar braut maðurinn kynferðislega gegn börnunum og kvikmyndaði brotin.
Ole Nielsen, sem stýrði rannsókn málsins, staðfesti að lögreglan hefði fundið ljósmyndir og myndbandsupptökur af brotum mannsins.
Á leikskólanum níddist maðurinn á 11 börnum og beitti þau kynferðislegu ofbeldi, nauðgunum og öðru ofbeldi. Einu barninu níddist maðurinn 5 sinnum á.
13 börn til viðbótar voru þolendur blyðgunarsemisbrota en flest þeirra urðu fyrir því að maður tók myndir af kynfærum þeirra þegar þau voru á skiptiborðinu eða í svefnálmunni.
Maðurinn hefur setið í gæsluvarðhaldi síðan í mars á síðasta ári en þá var hann handtekinn eftir að hafa káfað á og myndað 6-7 ára barn á meðan það svaf í félagsheimili skáta í Brøndby.
Þau 28 börn sem eru nefnd til sögunnar í ákæruskjalinu eru aðeins hluti þeirra barna sem maðurinn er talinn hafa brotið gegn.
Þá hefur maðurinn verið ákærður fyrir að taka myndir, með falinni myndavél, af nöktum börnum, aðallega drengjum, á aldrinum 6 til 9 ára í sundlaugum í Albertslund og Brøndby. Hann er einnig ákærður fyrir að hafa verið með rúmlega 10.000 barnaklámsmyndir í vörslu sinni og tæplega 1.500 myndbönd með barnaklámi.
Saksóknari fer fram á að maðurinn verði dæmdur til ótímabundinnar vistunnar í fangelsi en það er þyngsta refsing sem möguleg er í Danmörku. Slíkrar refsingar er aðeins krafist yfir afbrotamönnum sem taldir eru mjög hættulegir umhverfi sínu.
Stjórnendum leikskólans, sem maðurinn starfaði á, hefur verið vikið úr starfi á meðan yfirvöld fara betur yfir mál leikskólans.