Bandarískir embættismenn og ferðamenn hafa undanfarna mánuði snúið heim aftur með dularfulla heilaskaða eftir dvöl á Kúbu. Meðal þess sem hrjáir fólkið er svimi, skert heyrn, höfuðverkur, svefnleysi og skert hugræn geta.

Fólkið heyrði dularfull hljóð áður en það fór að finna fyrir þessum óþægilegu einkennum. Frá því í lok september hafa 19 bandarískir ferðamenn komið heim aftur með þessi undarlegu einkenni og það sama á við um 24 starfsmenn bandaríska sendiráðsins á Kúbu. Samkvæmt frétt Fox News þá hafa rannsóknir lækna sýnt að heilar fólksins hafa tekið breytingum og það orðið fyrir heilaskaða.

Ekki er vitað hver ástæðan er en bandarísk yfirvöld grunar að kúbanska ríkisstjórnin standi á bak við þetta og hafi meðvitað ráðist á bandaríska ríkisborgara, hugsanlega með vírus. Bandaríkjastjórn hefur þó ekki gengið svo langt að saka stjórnvöld á Kúbu um þetta en Rex Tillerson, utanríkisráðherra, telur að stjórnvöld á Kúbu séu meðvituð um hvað veldur þessum dularfullu veikindum.

Í október vísuðu bandarísk stjórnvöld fjölda kúbverskra stjórnarerindreka úr landi þar sem Kúba hefði ekki getað verndað bandaríska stjórnarerindreka eins og kveðið er á um í Vínarsáttmálanum.

Alríkislögreglan FBI hefur rannsakað málið en hefur komist að þeirri niðurstöðu að heilaskaði fólksins sé ekki tilkominn vegna „hljóðárása“.

Bandarísk stjórnvöld vara ríkisborgara sína við að ferðast til Kúbu þar sem heilbrigði þeirra og öryggi geti verið ógnað þar.