„Ég átti von á því Ísland myndi vera ótrúlegt en hver andskotinn, þessi staður er YFIRNÁTTÚRULEGUR!,“ ritar Sarah Jean Underwood fyrrum Playboy fyrirsæta en hún bættist í hóp Íslandsvina á dögunum. Sarah er ágætlega þekkt vestanhafs sem fyrirsæta, sjónvarpskynnir og leikkona en þekktust er hún fyrir að hafa verið kosin „leikfélagi“ ársins hjá Playboy tímaritinu árið 2007.
Fyrirsætan er afar vinsæl á samfélagsmiðlinum Instagram en rúmlega 8,9 milljón manns fylgjast þar með ævintýrum hennar. Af myndunum að dæma er hún dugleg að flakka um heiminn en hún heimsótti Ísland á dögunum og kolféll fyrir landi og þjóð. Því er ljóst að um ágætis landkynningu er að ræða en mörg hundruð þúsund manns hafa smellt „læk“á ljósmyndir hennar frá Íslandsförinni.
„Hversu fallegir eru þessir íslensku hestar,“ spyr fyrirsætan í texta við eina myndina og bætir við í gríni að hestarnir séu með fagurri hármakka heldur en hún sjálf.
Á annarri mynd má sjá fyrirsætuna á Evuklæðunum í náttúrulaug og bendir hún á að það sé sjálfsagt að vera „au naturel“ og sleppa sundfötunum þegar maður baðar sig í náttúrunni.
Hún notar um leið tækifærið og hneykslast á stefnu Instagram varðandi myndbirtingar á geirvörtum kvenna og kveðst hafa þurft að eiga við myndina í myndvinnsluforriti svo hægt væri að birta hana á miðlinum.
Þá virðist hún hafa verið hrifin af íslensku tofkofunum og bætir hún við að Íslendingar „verði greinilega að hugsa skapandi í þessu loftslagi sem þeir búa við.“