Þeir sem leggja afbrot fyrir sig verða að vera undir flest búnir og verða alltaf að búast við að dyr geti lokast að baki þeim. Það var einmitt það sem gerðist þegar tvítugur þjófur lét enn einu sinni til skara skríða í sölubás jarðarberja á norðanverðu Jótlandi í Danmörku.
Maðurinn hafði margoft stolið peningakassanum úr sölubásnum en hann er ómannaður. Treyst er á heiðarleika fólks og að það greiði fyrir jarðarberin þegar þau eru tekin úr sölubásnum. Peningakassi er í sölubásnum og setja viðskiptavinir peninga í hann og greiða sjálfum sér til baka ef þeir eru ekki með rétta upphæð handbæra.
Eigandi sölubássins var orðinn þreyttur á þessum sífelldu þjófnuðum og lá í leyni dag einn þegar þjófurinn kom. Þegar þjófurinn fór inn í sölubásinn brást eigandinn snarlega við og skrúfaði plötu fyrir dyrnar þannig að þjófurinn komst ekki út aftur. Samverkamaður þjófsins lagði þá á flótta í bíl en var greinilega í svo miklu uppnámi að hann ók út af veginum. Hann lagði þá á flótta á hlaupum en ekki gekk það betur en svo að lögreglan náði honum og handtók.
Því næst komu lögreglumenn að sölubásnum og handtóku innilokaða þjófinn. Nordjyske segir að hann hafi nú verið dæmdur í 10 mánaða fangelsi fyrir að hafa fjórum sinnum stolið úr peningakassanum í sölubásnum auk misheppnaða þjófnaðarins.
