Flestir árásarmennirnir handteknir eða látnir – Ætluðu að nota gaskúta til árása
Spænska hryðjuverkalögreglan réðst í gær inn í íbúð múslímaklerksins Abdelbaki es Satty í bænum Ripoll sem er skammt frá Barcelona. es Satty predikaði í mosku þar sem flestir safnaðarmeðlimir eru frá Marrokkó. Safnaðarmeðlimir segjast mjög slegnir yfir fréttunum af hryðjuverkunum á í Barcelona en es Satty er talinn vera höfuðpaurinn að baki árásinni sem hafði verið undirbúin í langan tíma.
Ali Yassine, forstöðumaður moskunnar, segir að fréttirnar hafi verið mikið áfall fyrir söfnuðinn. Abdelbaki es Satty og aðrir tilræðismenn úr árásinni eru sagðir hafa sótt guðsþjónustur í moskunni. Grunaður bílstjóri sendibílsins sem ók á gangandi vegfarendur á breiðgötunni Ramblan í Barcelona með þeim afleiðingum að 13 létu lítið og yfir 100 slösuðust, er talinn vera Younes Abouyaaqoub, 22 ára gamall, en lögreglan hefur enn ekki haft hendur í háris hans. Sky-fréttastofan ræddi við frænku hans sem sagði að fréttirnar hefðu komið allri fjölskyldunni mjög á óvart og engan hafi grunað að hann væri að undirbúa hryðjuverk.
Samfélag múslíma frá Marokkó í Ripoll kom saman í gær til að lýsa yfir andstyggð sinni á hryðjuverkunum í Barcelona.
Flestir mennirnir sem standa að baki árásunum í Barcelona hafa verið skotnir til bana eða handteknir, þó ekki bílstjórinn Younes Abouyaaqoub og höfuðpaurinn Abdelbaki es Satty. Hins vegar greinir Sky frá því að tvö lík hafi fundist í rústum húss sem sprakk í loft upp í bænum Alcanar. Húsið er talið hafa verið miðstöð hryðjuverkamannanna. Þar inni hafa fundist 120 gaskútar sem talið er að hryðjuverkamennirnir hafi ætlað að nota til árása. Ekki hafa verið borin kennsl á líkin en þau gætu verið af mönnunum eftirlýstu, Younes Abouyaaqoub og Abdelbaki es Satty.