Nokkrar borgir í Kína hafa bannað sölu á litlum lásbogum sem notið hafa vaxandi vinsælda meðal kínverskra ungmenna. AP-fréttastofan fjallaði um þetta í gær en bogarnir geta skotið litlum nálum eða tannstönglum af miklum krafti.

Foreldrar og skólayfirvöld í Kína hafa áhyggjur af leikfanginu sem er nógu öflugt til að gera gat á gosdósir eða skjóta í gegnum epli svo dæmi séu tekin, allt eftir tegund lásbogans. Ekki þarf að fjölyrða um hættuna sem gæti skapast ef einstaklingur fengi nál eða tannstöngul í augað.

Að sögn AP hafa borgaryfirvöld í Shenzhen og Qingdao bannað sölu á lásbogunum sem eru fáanlegir fyrir klink. Vinsældir lásboganna hafa borist til fleiri borga í Kína og lögreglan í Makaó, sem er sérstjórnarhérað í Kína, sá ástæðu til að gefa út viðvörun vegna þeirra á dögunum.

Í frétt AP kemur fram að ekki hafi borist tilkynningar um alvarleg slys á fólki, en þrátt fyrir það eru foreldrar og skólayfirvöld á varðbergi og hafa margir látið í sér á samfélagsmiðlum. „Fólk mun blindast út af þessu. Þetta verður að banna strax,“ sagði einn á meðan annar bætti við að þau fyrirtæki sem framleiða lásboganna yrðu að sæta ábyrgð.

Vinsælar netverslanir, Taobao og JD.com, hafa brugðist við þessum vaxandi áhyggjum með því að loka fyrir sölu á bogunum.