Bifreið, sem lögreglan veitti eftirför í morgun, endaði úti í Ölfusá. Sveinn Kristján Rúnarsson, yfirlögregluþjónn á Suðurlandi, segir í samtali við DV að eftirförin hafi byrjað í Reykjavík. Í tilkynningu frá Ríkislögreglustjóra segir að Ölfusárbrú verði lokuð meðan vinna á vettvangi stendur yfir.

Lögreglan er með mikinn viðbúnað á staðnum, en að sögn Vísis er ökumaðurinn kominn í spotta frá björgunarsveitum og er uppi á þaki bílsins.

Ásgeir Þór Ásgeirsson, yfirlögregluþjónn í Reykjavík, segir í samtali við DV að hann hafi fyrst heyrt af eftirförinni í Ártúnsbrekkunni. „Ökumaðurinn fór síðan aðeins inn í Árbæjarhverfið en fór svo Suðurlandsveginn. Bílnum var ekið út í Ölfusá, við brúna. Bíllinn stoppaði þar á steini og maðurinn komst sjálfur upp á bílinn. Það er búið að bjarga honum og hann er á leiðinni í sjúkrabíl. Hann ók sjálfur út í ánna og var einn í bílnum. Hann virðist ekki vera mikið slasaður,“ segir Ásgeir.