Samstarfsflokkarnir orðnir þreyttir á andstöðu og skeytasendingum
Talsverðrar ólundar er tekið að gæta í garð þingmanna Sjálfstæðisflokksins af hálfu kollega þeirra í ríkisstjórnarsamstarfinu, einkum Viðreisnarfólks. Framganga ákveðinna þingmanna Sjálfstæðisflokksins, sem hafi nánast frá upphafi ríkisstjórnarsamstarfsins sett sig upp á móti málum Viðreisnar og Bjartrar auk þess að senda flokkunum reglulega skeyti í fjölmiðlum, er „þreytandi“ að sögn þingflokksformanns Viðreisnar, sem vill þó ekki samþykkja að um samstarfsörðugleika sé að ræða innan ríkisstjórnarinnar. Heimildir DV herma þó að verulegs pirrings sé farið að gæta og beinist hann ekki aðeins að þeim þingmönnum Sjálfstæðisflokksins sem harðast hafi gengið fram í gagnrýni og andstöðu, heldur einnig að formanninum, Bjarna Benediktssyni forsætisráðherra. Hann er sagður hafa verið mikið fjarverandi og verkstjórn hans sé ekki næg, hann ætti að vera búinn að smala sínu liði.
Frá því að ríkisstjórn Sjálfstæðisflokks, Bjartrar framtíðar og Viðreisnar tók við völdum hefur gætt titrings og óeindrægni, og raunar áður en stjórnin var mynduð einnig. Í stjórnarmyndunarviðræðunum lýstu sumir þingmenn Sjálfstæðisflokksins verulegum efasemdum um samstarfið, bæði vegna þess hversu veikur meirihlutinn væri en einnig vegna þess að þeim hugnaðist ekki áherslur samstarfsflokkanna. Þá ríkti óánægja með ráðherraskipan flokksins sem birtist ljóslegast í því að Páll Magnússon, oddviti flokksins á Suðurlandi, studdi ekki ráðherraskipanina þar eð hann taldi að hann sjálfur hefði átt að verða ráðherra.
„Það er ekkert launungarmál að það voru ákveðnir samskiptaörðugleikar milli flokkanna í upphafi“
Þá hafa þingmenn Sjálfstæðisflokksins bæði verið ráðherrum samstarfsflokkanna óþægur ljár í þúfu, sem og beinlínis sett sig upp á móti ákveðnum málum þeirra, og það jafnvel málum sem eru tiltekin í stjórnarsáttmála. Þannig hafa þingmenn Sjálfstæðisflokks lýst því að þeir styðji ekki frumvarp félags- og jafnréttismálaráðherra, Þorsteins Víglundssonar, um jafnlaunavottun. Sömu sögu má segja um fjármálaáætlun ríkisstjórnarinnar til næstu fimm ára, þingmenn Sjálfstæðisflokksins hafa stigið fram og sagt að þeir muni ekki styðja hana óbreytta.
Samkvæmt upplýsingum DV er það einungis framganga hluta þingmannaliðs Sjálfstæðisflokksins sem fer fyrir brjóstið á samherjum þeirra í Viðreisn og Bjartri framtíð. Eru þar einkum nefnd nöfn þeirra Páls Magnússonar, Óla Björns Kárasonar, Njáls Trausta Friðbertssonar og Brynjars Níelssonar en einnig Ásmundar Friðrikssonar, Haraldar Benediktssonar, Jóns Gunnarssonar og Sigríðar Á. Andersen. Öll hafa þau með einhverjum hætti unnið gegn málum ráðherra samstarfsflokkanna og ekki farið leynt með það út á við. Þá er einnig nefnt að Valgerður Gunnarsdóttir hafi stigið fram og ekki sagst munu styðja fjármálaáætlunina. Í ljósi þess að ríkisstjórnin hefur aðeins eins manns meirihluta þá þykir ótækt að þingmenn komi fram opinberlega og lýsi því að þeir styðji ekki ríkisstjórnarmál.
Þá gætir orðið nokkurs óþols í garð Bjarna Benediktssonar, forsætisráðherra og formanns Sjálfstæðisflokksins. Bjarni þykir hafa verið afskiptalaus þegar kemur að andstöðu þingmanna hans við samstarfsflokkana og hafa leyft þeim að leika lausum hala við að gagnrýna mál ráðherra samstarfsflokkanna. Þá þykir Bjarni hafa verið mikið fjarverandi og þar með hafi skapast lausatök í verkstjórn ríkisstjórnarinnar. Að mati margra innan Viðreisnar er kominn tími til að Bjarni taki mál innan eigin flokks föstum tökum og komi múl á uppreisnargjarna þingmenn sína.
Hanna Katrín Friðriksson, þingflokksformaður Viðreisnar, vildi ekki í samtali við DV samþykkja að samstarfsörðugleikar væru á milli flokkanna en vissulega væru sífelldar skeytasendingar í fjölmiðlum þreytandi. „Það er ekkert launungarmál að það voru ákveðnir samskiptaörðugleikar milli flokkanna í upphafi en mín skoðun er að samheldnin hafi fremur verið að aukast eftir því sem á hefur liðið.“
Hanna Katrín bendir á að engin mál hafi verið stoppuð og vinna við þingmál Viðreisnar í nefndum þingsins gangi vel. Ef hins vegar kæmi á daginn að umræddir þingmenn Sjálfstæðisflokksins hygðust beita sér af krafti til að koma í veg fyrir afgreiðslu þeirra mála yrði að setjast niður og endurskoða hvort samstarfið sé á vetur setjandi, það gefi auga leið.
„Mín upplifun er sú að samstarfið gangi vel. Það eru ekki samstarfsörðugleikar milli þessara flokka. Síðan spyrðu hvort þetta sé ekki þreytandi, þessar skeytasendingar og andstaða. Þá er því til að svara að þegar um er að ræða þessi mál sem samið var um í stjórnarsáttmálanum, eins og jafnlaunavottunina, þá er það þannig, þetta er vissulega þreytandi. Ekki síst af því að þessi framganga býr til fóður fyrir fjölmiðlaumfjöllun um að það sé ekki samstaða og stemming milli flokkanna. Það er ekki þannig, ég upplifi að við séum sem heild að vinna vel saman inni á þingi og í nefndum.“
