Sífellt færist í vöxt að Íslendingar haldi hrekkjavöku, sem fer fram 31. október ár hvert, hátíðlega. Þökk sé bandarísku afþreyingarefni þá ríkir sá algengi misskilningur að um sé að ræða útþynnta og markaðsvædda ameríska hefð og út af því fussa margir og sveia þegar hátíðina ber á góma. Sannleikurinn er hins vegar sá að um er að ræða aldagamla keltneska hefð þar sem færðar voru þakkir fyrir uppskeru sumarsins og koma vetrarins boðuð. Hefðir eins og brennandi kerti í graskeri koma frá Írlandi og Skotlandi þar sem yfirleitt var notast við næpur.
Burtséð frá upprunanum þá er ljóst að hrekkjavaka er komin til að vera á Íslandi. Hér á landi er þó aðeins meiri sveigjanleiki varðandi hvenær hátíðarhöldin fara fram. Þannig eru fjölmörg hrekkjuvökupartí skipulögð um allt land um helgina. Íbúar í heilu bæjarfélagi, nánar tiltekið á Seltjarnarnesi, hafa síðan tekið höndum saman og skipuleggja sérstakan tíma þar sem börnin í bænum geta gengið á milli húsa og boðið húsráðendum að borga sér nammi gegn því að vera látnir í friði.
Hugmyndin um að skilgreina sérstakan „Grikk eða gott“-tíma var borin upp á Facebook-síðu íbúa á Seltjarnarnesi og var sérstök kosning skipulögð um viðburðinn. Hundrað og sjötíu íbúar samþykktu viðburðinn glaðir í bragði en þrjátíu einstaklingar völdu valkostinn „Ekki fleiri amerískar hefðir“. Það má því búast við vampírum, nornum og ýmiss konar forynjum á vappi um Seltjarnarnesið milli 17–19 á laugardaginn.