Þeir sem vilja berja norðurljósin augum eru í ágætis málum næstu kvöld en samkvæmt spá Veðurstofu Íslands munu veðurskilyrði verða einkar hagstæð. Sérstaklega er spáin góð á miðvikudagskvöld.
Á vef Veðurstofu má finna norðurljósaspá þrjá sólarhringa fram í tímann. Samkvæmt spánni verður virkni ljósanna allmikil á miðnætti í kvöld og heiðskírt einkum sunnan og austanlands. Þá verður virknin talsverð á þriðjudagskvöld.
Á miðvikudagskvöld verður síðan heiðskírt yfir landinu öllu og virkni mikil. Norðurljósavirknin er gefin upp á Kp-kvarða, frá 0 til 9, sem lýsir styrk segulsviðstruflana á jörðinni. Algengast er að gildið sé 0-3 og mjög sjaldgæft að það nái efstu tölunum. Á miðvikudagskvöld sýnir kvarðinn heil 6 stig.