Marseille er mengaðasta borg landsins
Á ári hverju láta 48 þúsund manns lífið í Frakklandi vegna loftmengunar þar í landi. Flest dauðsföllin væri hægt að koma í veg fyrir, samkvæmt nýrri rannsókn.
Í rannsókninni kemur fram að fólk á þrítugsaldri sem býr í borgum með yfir 100 þúsund íbúa víða um landið geta átt von á að líf þeirra verði 15 mánuðum styttra en ella. Þá á fólk á þrítugsaldri sem býr á svæðum sem rúma tvö til hundrað þúsund von á að líf þeirra verði tíu mánuðum styttra, að meðaltali.
Á ári hverju væri hægt að bjarga 34 þúsund Frökkum og lengja líf þeirra um níu mánuði með minni mengun. Þá kemur fram í rannsókninni að mengunina megi rekja til manna, en hún kemur að mestu frá iðnaði, landbúnaði, samgöngum og hita.
Meðal Frakka eru dauðsföll af völdum reykinga og áfengis þau einu sem algengari eru en dauðsföll af völdum mengunar, en um 78 þúsund manns láta lífið árlega vegna reykinga og 49 þúsund vegna áfengisnotkunar.
Frönsk stjórnvöld hafa verið vakandi fyrir aukinni mengun á undanförnum árum. Það sem mest kom á óvart var að París er ekki mengaðasta borgin. Borgin Marseille fékk þann vafasama heiður að hljóta nafnbótina mengaðasta borg Frakklands. Þar á eftir kom borgin Lyon og í þriðja sæti var höfuðborgin, París.
Stjórnvöld í París hafa beitt ýmsum brögðum til að koma í veg fyrir mengun í borginni og hafa verið sett fram ýmis boð og bönn, en í mars á síðasta ári fékk borgin nafnbótina „Mengaðasta borg á jörðinni“.