„Samfylkingin er of langt til vinstri fyrir mig. Samfylkingin er of langt til hægri fyrir mig. Hún er of stjórnlynd, hún er of frjálslynd.Samfylkingin er ekki nógu Evrópusinnuð, hún sveik í stjórnarskrármálinu, hún anaði út í þetta stjórnarskrármál og er með Evrópu á heilanum Þar eru of margir femínistar og hún sinnir femínisma skammarlega lítið. Samfylkingin er ekki nógu og hún er of.“

Þetta skrifar Guðmundur Andri Thorsson rithöfundur á Facebook-síðu sinni. Þar fjallar hann um ákvörðun Árna Páls Árnasonar sem ákvað að draga framboð sitt til formannsembættisins í Samfylkingunni til baka. Guðmundur Andri segir að vinstri menn hafi nánast gert það að listgrein að styðja ekki Samfylkinguna „og finna ný og ný blæbrigði ágreinings til að finna rökstuðning fyrir því að vilja ekki styðja þessa breiðfylkingu frjálslyndra og vinstri manna sem átti að verða. Á meðan er landinu stjórnað frá Panama.“

Guðmundur Andri bætir við:

„Nú hafa vinstri menn misst eina af ástæðunum sem tilgreindar eru fyrir því að styðja ekki Samfylkinguna: Árni Páll ætlar að hætta sem formaður.“

Telur Guðmundur Andri að ákvörðun Árna sé skynsamleg. Það sé sama hvernig Árni standi sig, hann virðist ekki fá stuðning frá kjósendum.

„Mér fannst hann býsna öflugur nú á dögunum þegar SDG var að hrökklast frá völdum flæktur í eigin ósannindavef en greinilega var ég nánast einn um þá skoðun, því það er eiginlega sama hvernig Árni hefur verið: hann hefur einhvern veginn aldrei fengið séns hjá kjósendum,“ segir Guðmundur Andri og bætir við: „Kannski fær hann það núna. Eflaust kemur einhver í staðinn sem er of og ekki nógu.“