Aflandskrónueigendum býðst að selja eignir sínar í skiptum fyrir reiðufé í erlendum gjaldeyri á genginu 190 til 210 krónur fyrir hverja evru í gjaldeyrisútboði Seðlabankans. Fer útboðið fram, eins og upplýst var fyrst um í DV, fimmtudaginn 16. júní næstkomandi en eigendur aflandskróna að fjárhæð tæplega 320 milljarða geta tekið þátt í útboðinu.

Þetta kemur fram í tilkynningu frá Seðlabankanum en útboðsfyrirkomulagið verður með þeim hætti að öll samþykkt tilboð bjóðast fjárfestum á sama verði (e. single price). Þá mun verð seldra evra í gjaldeyrisútboði Seðlabankans ráðast af þátttöku í útboðinu. Þannig fá aflandskrónueigendur, líkt og áður hefur verið greint frá í DV, hagstæðara útboðsgengi ef fleiri aðilar kjósa að taka þátt í útboðinu og þá um leið eru auknar líkur á því að ekki verði neinar eftirlegukindur (e. hold-outs) í hópi aflandskrónueigenda eftir að útboðinu lýkur um miðjan næsta mánuð.

Aflandskrónuútboðið er næsta stóra skrefið – hið fyrsta var uppgjör slitabúa gömlu bankanna – í heildstæðri áætlun stjórnvalda um losun hafta sem var fyrst kynnt í Hörpu í júní á síðasta ári. Samkvæmt frumvarpi fjármálaráðherra um meðferð aflandskrónueigna, sem var samþykkt á Alþingi síðastliðið sunnudagskvöld, er aflandskrónueigendum gert að sæta afarkostum þar sem þeim býðst að skipta á krónueignum sínum í evrur í fyrrnefndu útboði Seðlabankans ella að fjármunir þeirra verði fluttir á læsta reikninga sem bera 0,5% vexti og endurskoðaðir á tólf mánaða fresti af Seðlabankanum.

Í frumvarpi fjármálaráðherra er gert ráð fyrir því að þeir aflandskrónueigendur sem taka ekki þátt í útboðinu og enda með fjármuni sína á læstum lágvaxtareikningum fái engu að síður tímabundna heimild – frá 1. september til 1. nóvember 2016 – til þess að eiga í gjaldeyrisviðskiptum við Seðlabankann þar sem viðmiðunargengið verður 220 krónur gagnvart evru.