Eldur kom upp í húsnæði lyftaraþjónustunnar Hraðbergs við Vesturvör í Kópavogi á þriðja tímanum í nótt og er húsið gjörónýtt. Slökkvistarf tók um tvær klukkustundir og var því lokið um fimm leytið í morgun. RÚV greinir frá.
Einn maður mun hafa verið í húsinu, sem er tiltölulega nýlegt, og tókst honum að forða sér í tæka tíð þegar brunaviðvörunarkerfi fór í gang. Eldsupptök eru ókunn.
Jón Friðrik Jóhannesson, deildarstjóri hjá Slökkviliði höfuðborgarsvæðisins, segir að aðkoman hafi verið þannig að mikill eldur var í lyftarageymslu í horninu á húsinu. Slökkviliði tókst að koma í veg fyrir að eldurinn bærist í önnur bíl.
„Það voru töluverðar sprengingar inn í húsnæðinu, það eru gaskútar og annað þannig að við vorum ekkert að senda menn inn. Við vorum því að slökkva eldinn utan frá og fórum síðan í að bjarga verðmætum úr næsta bili, meðal annars þremur bílum,“ segir Jón Friðrik.