Fjölmargir hafa lýst yfir óánægju sinni með viðburðinn – Hópurinn Beinar aðgerðir setur ríkisstjórninni afarkosti
Grasrótarhópurinn Beinar aðgerðir hafa boða til mótmæla við heimili Bjarna Benediktssonar fjármálaráðherra þann 1. maí næstkomandi. Óhætt er að segja að þetta mælist misjafnlega fyrir hjá fólki og eru flestir þeirrar skoðunar að allt of langt sé gengið.
Fleiri hundruð manns hafa fengið boð í gegnum Facebook um að taka þátt í mótmælunum sem fyrirhuguð eru þann 1. maí næstkomandi. Á Facebook-síðu viðburðarins kemur fram að yfirskrift mótmælanna sé Grillum á kvöldin – sækjum þau heim.
„Hópurinn hvetur alla landsmenn til að mæta í grillið með einnota grill, mat, tjaldstóla, trommur og góða skapið. Einnig er gott að æfa raddböndin aðeins og slagorð til þess að syngja. Í kjölfarið verða heimili ráðherra ríkisstjórnarinnar þrædd, eitt heimili á kvöldi. Látum þá ekki sitja eina að grilli og gróða á kostnað okkar hinna!
Ef gleðskapurinn hentar ekki Bjarna Benediktssyni og hans félögum í ríkisstjórn þá er lítið mál að kippa því í liðinn. Það eina sem hann þarf að gera er að samþykkja kröfur hópsins fyrir 1. Maí,“ segir á Facebook-síðu viðburðarins en kröfurnar eru þær að ríkisstjórnin segi af sér og mynduð verði utanþingsstjórn. Þá verði sett dagsetning á kosningar, ekki síðar en 10. september. Verði ríkisstjórnin ekki við þessum körfum verði mótmælt við heimili Bjarna klukkan 19 þann 1. maí næstkomandi.
Fjölmargir hafa tjáð sig á Facebook-síðu viðburðarins og er óhætt að segja að hann mælist misjafnlega fyrir hjá fólki. Eru flestir þeirrar skoðunar að of langt sé gengið, heimili sé griðarstaður fólks og þarna búi börn. Hér má sjá brot af ummælunum sem finna má á síðunni:
„Skammist ykkar – látið manninn og hans fjölskyldu í friði. Svona á ekki að gera, fara að heimili þar sem börnin hans eru og kona, hvað er að hjá ykkur.“ – Róbert Óskar Sigurvaldason
„Þetta er ein aumasta hugmynd sem ég hef heyrt lengi. Þeir sem mæta á svona viðburð dæma sig sjálfir með lágkúrulegri framkomu. Þarna eru börn og aðrir ótengdir íbúar. Hvet skipuleggjendur að hætta við þessa staðsetningu og engan að mæta á mótmæli sem er ekkert nema árás á einkalíf. Þá gildir engu í hvaða flokki þeir standa.“ – Þórhallur Harðarson
„Kommon fólk, ekki vera fífl. Þótt að maður sé ósammála einhverjum í pólitík eða í öðru gefur það ekki manni rétt til að ráðast að friðhelgi heimili manna og mótmæla þar fyrir utan. BB á fjölskyldu og nágranna sem eru ekki í pólitík, höldum þeim fyrir utan þetta. Mætum frekar á Austurvöll ef fólk er í mótmælagírnum.“ – Matthías Freyr Matthíasson
„Er þessi hópur á vegum Framsóknarflokksins? Og markmiðið að gera andstöðu við ríkisstjórnina að viðhorfi eins fárra og mögulegt er?“ – Guðmundur Andri Thorsson
„Þetta er arfaslæm hugmynd; látið heimili og fjölskyldur ráðamanna í friði.“ – Erlendur S. Þorsteinsson
„Ég styð ekki mótmæli af þessu tagi. Vanhugsað.“ – Steinunn Ólína Þorsteinsdóttir
„Þetta er klikkun. Hvað þykist þið eiginlega vera að gera?“ – Erna Ýr Öldudóttir
„Ég mun ekki mæta þarna. Þetta er of langt gengið og ekki málstaðnum til framdráttar.“ – Vilhjálmur Þorsteinsson
Þá hefur Árni Páll Árnason, formaður Samfylkingarinnar, tjáð sig um mótmælin á Facebook-síðu sinni. „Þetta er afskaplega ógeðfellt og fjarri öllu velsæmi. Fólk getur mótmælt við opinberar byggingar, en heimili fólks eiga að njóta friðhelgi.“