Ótrúleg saga 29 ára Ástrala
Ástralinn Luke Moore lifði sannkölluðu lúxuslífi í um tvö ár þegar hann nýtti sér galla hjá viðskiptabanka sínum. Luke þessi, sem er 29 ára, var í raun ósköp venjulegur meðaljón og hafði enga innistæðu fyrir lúxuslíferni sínu. Gallinn í bankanum gerði það hins vegar að verkum að Luke gat tekið eins mikinn yfirdrátt og hann vildi.
Í frétt Daily Telegraph í Ástralíu kemur fram að Luke hafi sólundað sem nemur 234 milljónum króna í lúxusbíla, fatafellur og djamm. En upp komast svik um síðir og lúxuslíf Luke entist ekki lengi. Hann var dæmdur í fangelsi fyrir fjársvik árið 2015 en var sleppt á dögunum eftir að dómurinn yfir honum var ógildur. Luke hafði verið dæmdur í sjö ára fangelsi en hann getur nú um frjáls höfuð strokið.
Allt hófst þetta árið 2010 þegar Luke var 22 ára og atvinnulaus bótaþegi. Hann vantaði pening og ákvað að taka yfirdrátt hjá viðskiptabanka sínum, St. George, til að komast yfir erfiðasta hjallann. Áður en árið var úti var yfirdráttarskuldin orðin rúm ein milljón króna. Luke hélt að bankinn myndi loka reikningi hans enda greiddi hann aldrei skuldina. En allt kom fyrir ekki og alltaf gat Luke tekið út pening og borgað með korti sínu – alveg sama hversu háar upphæðirnar voru.
Luke sá sér leik á borði og keypti allskonar varning og þá einna helst bíla. Hann byrjaði rólega; keypti sér Hyundai Veloceter sem kostaði 3,5 milljónir, því næst Aston Martin DB7 fyrir 10 milljónir króna og loks Maserati-lúxussportbíl sem kostaði 18 milljónir króna. Þá keypti hann sér bát fyrir 6 milljónir króna og fór í glæsileg ferðalög til Taílands og um heimaland sitt Ástralíu.
Þetta var ekki það eina sem Luke gerði því hann keypti sér einnig körfuboltatreyju sem var árituð af sjálfum Michael Jordan og plötur sem voru áritaðar af Michael Jackson, Bob Dylan og meðlimum Led Zeppelin. Loks keypti hann sér listaverk eftir fræga listamenn, Banksy þar á meðal.
Þegar bankinn áttaði sig á hvað væri í gangi var Luke búinn að sólunda sem nemur rúmum hundrað milljónum króna auk þess sem hann var með aðrar hundrað milljónir á öðrum bankareikningi. Í viðtalinu við Telegraph sagðist Luke vera nokkuð sáttur við líf sitt í dag þó hann hafi ekki lengur ótakmarkaðan aðgang að fjármagni.
„Með aldrinum færist vitið yfir mann og ég hef komist að því að peningar eru ekki allt saman – en þetta var gaman meðan það entist,“ sagði Luke sem í dag býr heima hjá mömmu sinni eftir að hafa verið sleppt úr fangelsi.