Kvikmyndaleikstjórinn Lovísa Lára Halldórsdóttir hefur sett af stað söfnun á Karolinafund svo hún geti lokið við kvikmynd sína Týndu Stelpurnar og komið henni í bíó.

„Hvað verður um Týndu stelpurnar sem lýst er eftir á fréttasíðum? Fjórtán ára bestu vinkonur, Lára og Telma halda að þær hafa orðið vitni að morði. Þær ákveða að rannsaka málið sjálfar. Þær vita þó ekki að sú ákvörðun mun ekki bara reyna á vináttu þeirra, heldur einnig stefna lífi þeirra í hættu.“

Þannig er Týndu stelpunum lýst á Facebooksíðu myndarinnar.

Týndu stelpurnar Stilla úr mynd Lovísu Láru

„Ég vildi segja þessa sögu fyrst og fremst því að mér finnst ég sjaldan sjá myndir í bíó sem eiga eitthvað við mig, hvað þá íslensku bíói. Það er lítið um myndir þar sem að kvenpersónur eru í aðal hlutverkum og lítið af myndum fyrir ungt fólk. Mér fannst líka áhugavert að sýna hversu mikið af upplýsingum fólk er að senda frá sér á netið. Ungt fólk er að taka upp allt lífið sitt og birta á youtube, facebook og snapchat,“ segir Lovísa Lára.

Tökum á myndinni er lokið en Lovísa Lára sagði frá því í viðtali við DV í september að hún hafi fjármagnað þær að mestu leiti sjálf með aðstoð fyrirtækja. Nú vantar bara herslumuninn svo hægt sé að ljúka við klippingu, hljóðvinnslu, tónlist og aðra eftirvinnslu.

„Við þurfum að safna 20.000 evrum sem eru tæpar tvær og hálf milljón. Við erum komin með 7% af upphæðinni núna. Það eru alltaf að koma jafnt og þétt áheit en söfnunin hefur ekki tekið almennilegan kipp ennþá,“ segir Lovísa Lára, en hún hefur 27 daga til að ljúka fjármögnuninni.