Fjárfestarnir Sigurbjörn, Árni og Hallbjörn greiddu Arion banka 585 milljónir fyrir 2,4% í Símanum
Viðskiptafélagarnir Sigurbjörn Þorkelsson, Árni Hauksson og Hallbjörn Karlsson eiga 48 prósent í eignarhaldsfélaginu sem keypti hlutabréf í Símanum í umdeildri sölu Arion banka í ágúst í fyrra. Þeir eignuðust þá 2,4 prósenta hlut í fjarskiptafélaginu og greiddu 585 milljónir fyrir bréfin sem eru nú metin á 692 milljónir. Félag í helmingseigu Orra Haukssonar, forstjóra Símans, fékk lánaðar 200 milljónir króna fyrir kaupum á 0,83 prósenta hlut í fyrirtækinu. Fjárfestahópur sem fjórmenningarnir tilheyra keypti alls fimm prósent í Símanum á 1.215 milljónir eða rúmlega 115 milljónum minna en haldið hefur verið fram.
Hópurinn keypti bréfin af Arion banka í gegnum eignarhaldsfélagið L1088 ehf. Samkvæmt nýbirtum ársreikningi þess áttu Sigurbjörn, Árni og Hallbjörn alls 48,15 prósenta hlut í því í árslok 2015 en eignin er skráð á félag þeirra Æðarnes ehf. Orri Hauksson, sem leiddi fjárfestahópinn saman fyrri hluta 2015, og Gunnar Fjalar Helgason, yfirmaður stefnumótunar og stjórnunar hjá Símanum, áttu 16,5 prósent í gegnum Frost Capital ehf. Gunnar hefur ekki áður verið nefndur í tengslum við kaupin en aðrir íslenskir hluthafar L1088 voru nafngreindir þegar þau voru í hámæli fyrir ári. Félag hans og Orra tók samkvæmt ársreikningi Frost Capital lán í fyrra upp á 200 milljónir króna, eða fyrir öllum hlutnum sem þeir keyptu í Símanum, en í árslok 2015 nam hlutafé þess 120 þúsund krónum.
Félagið Íshóll ehf. er þriðji stærsti eigandi L1088 með 15,63 prósenta hlut. Það er í eigu Stefáns Ákasonar, fyrrverandi forstöðumanns skuldabréfamiðlunar Kaupþings. Bertrand Kan, hollenskur fjárfestir og stjórnarmaður í Símanum, átti 6,38%. Önnur bréf félagsins voru í eigu innlendra og erlendra fjárfesta sem tóku þátt í kaupunum.
LH1088 keypti alls 482.500.000 hluti í Símanum á genginu 2,518. Kaupverðið var því 1.215 milljónir króna en ekki rúmlega 1.330 milljónir líkt og fullyrt hefur verið í fjölmiðlum. Þetta staðfestir Sigurbjörn Þorkelsson, stjórnarformaður Fossa markaða, í samtali við DV. Skýringuna á hærri upphæðinni má að öllum líkindum rekja til þess að stjórnendur hjá Símanum keyptu til viðbótar 0,5 prósenta hlut í fjarskiptafélaginu af Arion banka með beinum hætti. Þegar sá eignarhlutur er lagður saman við bréf L1088 í Símanum nemur heildarkaupverðið 1.336 milljónum.
Eigendur L1088 mega ekki selja bréfin fyrr en í janúar á næsta ári. Gengi hlutabréfa fjarskiptafélagsins var við lokun markaða í gær, fimmtudag, 18 prósentum hærra en verðið sem Arion banki fór fram á. Bréf Símans voru þá metin á 2,98 krónur á hlut og fimm prósenta eignarhlutur L1088 því 1.437 milljóna króna virði. Í árslok 2015 var hann metinn á 1.746 milljónir í bókum félagsins en gengið var þá 3,62 krónur á hlut.
Meðlimir hópsins keyptu bréfin tæpum tveimur mánuðum áður en almennt hlutafjárútboð á eign Aron banka í Símanum fór fram. Bankinn seldi þá 21 prósent í félaginu og var útboðsgengi Símans 3,33 krónur á hlut. Salan til L1088 vakti mikla athygli en einnig kaup valinna vildarviðskiptavina bankans á öðrum fimm prósentum í fjarskiptafyrirtækinu. Bjarni Benediktsson, fjármála- og efnahagsráðherra, sagði viðskiptin hafa rýrt traust almennings á fjármálamarkaði. Arion banki viðurkenndi að salan til vildarvinanna hefði verið misráðin en taldi viðskiptin við L1088 hafa verið réttmæt. Álitsgjafar Markaðarins, fylgirits Fréttablaðsins um viðskipti og efnahagsmál, völdu söluna á eignarhlut Arion í Símanum verstu viðskipti ársins 2015.