„Á þeim fjórum dögum sem undirskriftasöfnun Kára hefur staðið yfir hafa 40 þúsund landsmanna tekið undir kröfuna um að útgjöld til heilbrigðismála verði 11% af landsframleiðslu í stað 8.7%. Eru það heldur færri en ég gerði fyrirfram ráð fyrir.“
Þetta segir Brynjar Níelsson í pistli á Pressunni sinni og hnýtir þar í Kára Stefánsson forstjóra Íslenskrar erfðagreiningar. Líkt og greint hefur verið frá ítrekað í fjölmiðlum hefur Kári staðið fyrir undirskriftasöfnun þar sem hann skorar á stjórnvöld að verja árlega 11% af vergri landsframleiðslu til reksturs heilbrigðiskerfisins. Yfir 40 þúsund manns hafa tekið þátt í áskorun Kára. Brynjar Níelsson og Jón Gunnarsson hafa gagnrýnt vísindamanninn og svaraði Kári á þá leið í gær að þeir flokksbræður væru hræddari við skattahækkanir en þjáningar og dauða samborgara sinna. Í frétt Eyjunnar er haft eftir Kára:
„Þeir eru hins vegar báðir góðir og hjartahlýir menn og þess vegna ætla ég að skrifa þessa vitleysu þeirra á hvatvísi og hættulega tryggð við formann flokks þeirra sem þarf einmitt á því að halda að einhver segi honum til vamms í stað þess að etja honum á það exelskjala forað sem hann virðist svo elskur að.“
Brynjar svarar Kári í dag og segir að forstjórinn hefði náð svipuðum árangri með undirskriftasöfnun um aukið hlutfall af landsframleiðslu færi til menntakerfisins, til elli- og lífeyrisþega, lögreglu og dómsmál, í samgöngur, fæðingarorlof, málefni barna eða til menningar og lista. Brynjar segir:
„Í þessa málaflokka ásamt heilbrigðismálum fer megnið af öllum útgjöldum ríkisins. Má því ætla að krafa Kára um 50 milljarða aukningu í heilbrigðismálin á hverju ári yrði fyrst og fremst á kostnað framangreindra málaflokka.“
Þá segir Brynjar ljóst að vegna aldurssamsetningar þjóðarinnar verði ekki hjá því komist að auka fé til heilbrigðismála í nánustu framtíð.
„Svo að það verði ekki um of á kostnað annarra mikilvægra málaflokka, sem snerta innviði í okkar örsmáa samfélagi, er mikilvægt að auka landsframleiðsluna. Mestir möguleikar okkar í þeim efnum felast í orkusölu hvort sem okkur líkar betur eða verr.“
Brynjar bætir við:
„Sá hagvöxtur sem hefur fylgt aukinni framleiðslu í tíð þessarar ríkisstjórnar hefur annars vegar farið í almennar kjarabætur með hækkun launa og lækkunar skulda landsmanna og hins vegar í heilbrigðiskerfið. Forgangsröðun núverandi stjórnarmeirihluta ætti því að vera Kára ljós sem og fylgjendum hans. Forgangsröðun fyrri ríkisstjórnar var önnur eins og menn væntanlega muna.“
Hér má lesa pistil Brynjars í heild sinni.