„Papinn“ Ingvar Jónsson hefur útskrifað fimm hópa í markþjálfun
„Bakgrunnur þátttakenda á námskeiðum Profectus hefur verið af ýmsum toga, enda er þar að finna stjórnendur, sálfræðinga, einkaþjálfara, presta, félagsfræðinga, fjölskylduráðgjafa, andlitslesara, hópstjóra, verkstjóra, meðferðarfulltrúa, prófarkalesara og nuddara.“ Þetta segir skemmtikrafturinn Ingvar Jónsson, sem áður fyrr var andlit einnar vinsælustu hljómsveitar landsins, Papanna.
Ingvar hefur heldur betur breytt um kúrs síðan hann tryllti dansþyrsta Íslendinga um gervallt Íslands. Tæplega fertugur lagði hann stund á alþjóða markaðsfræði og útskrifaðist í framhaldinu frá CBS með MBA-gráðu, en í náminu kynntist hann markþjálfun, sem var á meðal þeirra verkfæra sem nemendur nýttu til að styðja hver annan. Ingvar segir að í kjölfar vandlegrar sjálfskoðunar hafi hann uppgötvað að tíma hans væri best varið ef hann styddi aðra til vaxtar í gegnum viðlíka sjálfskoðun.
Ingvar fékk vottun í markþjálfun frá International Coaching Federation (IFC) árið 2011 og hefur ekki setið auðum höndum síðan. Hann kom á laggirnar mannauðsfyrirtækinu Profectus sem hefur í dag útskrifað fimm hópa í markþjálfun; tvo hópa í Suður-Afríku, einn á Írlandi og tvo á Íslandi. Nemendur þessara hópa hafa komið víða að; Írlandi, Englandi, Spáni, Hollandi, Bandaríkjunum, Suður-Afríku og, að sjálfsögðu, Íslandi. Í vor er í bígerð að halda námskeið í markþjálfun á Indlandi.
Hann segir að sérstaða Profectus í kennslu byggi meðal annars á því að kennt er í litlum hópum, mest 12 nemendur. áherslan sé lögð á aðgerðabundið nám, „learning by doing“, og gerðar eru miklar kröfur til vinnu af hálfu nemendanna.
Ingvar, sem skrifað hefur tvær bækur um markþjálfun segir að á meðan náminu stendur nýti nemendur markþjálfann sem verkfæri til sjálfskoðunar, og svo þeir kynnist mismunandi aðferðum séu að minnsta kosti fimm vottaðir markþjálfar fengnir til að taka að sér sýnikennslu. Nemendur öðlist skilning á tengingu taugavísinda og virkni heilans við markþjálfaferlið, hlutverki markþjálfans og öllum ellefu hæfnisþáttum markþjálfunar.
