„Ef þig dreymir um að stunda fallhlífastökk í Noregi, brimbretti á Hawaii eða fjallaskíði á Grænlandi þá er Villi maðurinn fyrir þig. Ef ekki, þá er hann með góða líftryggingu. Það skemmir ekki fyrir að hann er vel menntaður og í góðri vinnu.“ Þannig hljómar auglýsing á sérstakri heimasíðu sem vinir Vilhjálms Þórs Gunnarssonar komu á laggirnar í þeim eina tilgangi að finna handa honum heppilegan kvenkost. Er Vilhjálmi meðal annars lýst sem skipulögðum og fjallmyndarlegum manni sem af einhverjum óskiljanlegum ástæðum er ekki enn genginn út.
„Blaðamaður, á núna að fara að auka ennþá meira í ruglið?“ spyr Vilhjálmur, einnig þekktur sem Villi hlæjandi þegar blaðamaður hefur samband við hann til að fá að vita álit hans á þessu frumlega uppátæki. Aðspurður kveðst Villi vera öllu vanur frá félaga sínum sem átti hugmyndina að síðunni, enda sé sá vinur framtakssamur með eindæmum. „Hver þarf óvini þegar þeir eiga svona vini?“
Sjálfur fékk Villi að vita af síðunni kvöldið áður en hún fór á loftið, á 29 ára afmælisdegi hans. Fékk hann þá sendan hlekk á síðuna ásamt þeirri orðsendingu að innan skamms myndu birtast keyptar auglýsingar á Facebook um hina tilteknu síðu. Hann segir viðbrögðin við síðunni hafa verið góð og nú þegar hafi honum borist skeyti frá áhugasömum stúlkum. „Ég er búinn að fá nokkur, ég held að það væri ókurteisi að kjafta hvernig en það á alveg eftir að koma eitthvað súper frumlegt!“ segir hann og bætir við að einnig hafi honum borist vinabeiðnir og „pot“ á facebook, auk ábendinga um stúlkur.
„Ég hef nú bara ekkert verið að leita þannig séð, ég hef ekkert átt í vandræðum með að deita. Þetta var bara meira grín hjá þessum vinum heldur en nokkuð annað,“ segir Villi aðspurður um hvort hér sé á ferð örvæntingarfull lokatilraun til að koma Villa út af stefnumótamarkaðnum. „En hef klárlega alltaf gaman að því að hitta fólk, ég er mjög opinn og finnst fátt vandræðalegt þó að öðrum finnist það.“
