Lóa Pind: Skildi eftir 23 ára samband – kynntist nýja kærastanum á Tinder

Kaflaskipti í lífi sjónvarpskonunnar

Prýðir forsíðu október tölublaðs tímaritsins MAN.
Lóa Pind Prýðir forsíðu október tölublaðs tímaritsins MAN.
Mynd: MAN

„Mér fannst það alls ekki auðvelt, fannst það ekki við hæfi að ég væri þarna inni, 47 ára gömul sjónvarpskona,“ segir Lóa Pind Aldísardóttir, fréttakona á Stöð 2, í viðtali í nýjasta tölublaði MAN. Vísar hún þarna í þá ákvörðun að skrá sig á Tinder, ákvörðun sem hún sér væntanlega ekki eftir í dag.

Lóa Pind, sem hefur starfað hjá 365 miðlum í tólf ár, prýðir forsíðu október tölublaðs MAN sem kemur í verslanir á morgun. Um er að ræða fimmtugasta tölublað tímaritsins.

Í viðtalinu fer Lóa Pind um víðan völl en hún er nú með tvær þáttaraðir í farvatninu, aðra um Snapchat. Lóa talar um nýjan kafla í lífi sínu en hún skildi nýverið við sambýlismann sinn til 23 ára, Sigfús Bjartmarsson.

Hún segir það hafa verið erfiðustu ákvörðun sem hún hafi á ævinni tekið en hún sé þó sátt við hana. Hún flutti þá úr 230 fermetra húsi í 90 fermetra íbúð í miðbænum.

„Mér finnst mikið frelsi í að geta hagað lífinu algjörlega á mínum forsendum – án þess að fyrrverandi sambýlismaðurinn minn hafi verið að hefta mig á nokkurn hátt, því við studdum hvort annað,“ segir hún meðal annars.

Lóa var þó ekki lengi einhleyp því fyrir nokkrum mánuðum hitti hún nýju ástina í lífi sínu eftir að hún skráði sig á Tinder. „Mér fannst það alls ekki auðvelt, fannst það ekki við hæfi að ég væri þarna inni, 47 ára gömul sjónvarpskona.“

Þar kynntist hún svo Jónasi Valdimarssyni verkfræðingi sem búsettur er í Danmörku. „Ég er gríðarlega skotin í þessum sæta ofvirka gaur þótt það flæki aðeins tilhugalífið að vera búsett hvort í sínu landinu. En endurfundirnir verða þá heitari fyrir vikið,“ segir Lóa meðal annars í opinskáu viðtalinu.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.