„Hann sagðist vera mjög hrifinn af því að fá að taka þátt í verkinu og vera partur af því,“ segir listakonan Katla
Neglur Sigmundar Davíðs Gunnlaugssonar prýða nú listaverk Kötlu Guðbjargar Gunnarsdóttur nemanda í Lungaskólanum á Seyðisfirði
„Ég tók eftir að Sigmundur Davíð var í bænum svo ég ákvað að búa til boðskort fyrir hann á opnun sýningarinnar D-vítamín, sem nemendur Lungaskólans ásamt gestakennurunum Lotte Rose Kjær Skau og Daniel Grossman stóðu fyrir“ segir Katla
Verk Kötlu er kassi á borði á gólfkúlum og á hjólum. Kassinn hefur gat að framan til að stinga inn höndinni og tvö göt á báðum hliðum til að stinga inn naglaklippum.
„Hugmyndin byrjaði þegar ég var að klippa neglurnar og fór að pirrast á því hvað þær skjótast mikið út um allt. Ég vildi búa til eitthvað sem kæmi í veg fyrir það,“ segir Katla.
Katla segir að fólki hafi fundist þetta svolítið flókið spil svo hún þurfti að standa við verkið út opnunina sem leiðbeinandi.
„Sigmundur Davíð gekk brosandi inn um dyrnar. Við heilsuðumst, hann tók af sér vettlingana og ég leiðbeindi honum í gegnum ferlið. Svo tókumst við auðvitað í hendur eftir að nöglin hans var fallin niður á spaghettíið. Hann þakkaði kærlega fyrir sig og sagðist vera mjög hrifinn af því að fá að taka þátt í verkinu og vera partur af því,“ segir Katla að lokum.
