fbpx
Mánudagur 21.janúar 2019
Fókus

Húsin í bíó – Ekki er allt sem sýnist

Ragna Gestsdóttir
Laugardaginn 5. janúar 2019 18:20

Kvikmyndir eru töfraheimur og margt sem þarf til svo úr verði heil kvikmynd. Það er ekki bara fólk í ótal hlutverkum, bæði fyrir framan og aftan myndavélarnar. Leikmunir skipta líka öllu máli, bæði litlir og stórir, og leikmynd þarf líka að vera til staðar.

Í mörgum kvikmyndum gegna hús eða íbúðir stóru hlutverki af heildarmyndinni og erfitt er að sjá fyrir sér að myndin væri sú sama hefði annað hús (eða íbúð) verið notað. Hver man til dæmis ekki eftir húsi McCallister-fjölskyldunnar í Home Alone og íbúð vinahópsins í Friends?

Sama á við um margar íslenskar kvikmyndir og hér eru fimm alkunn hús úr þekktum kvikmyndum.

Bakki – Ég man þig

Í kvikmyndinni Ég man þig, sem gerð er eftir samnefndri bók Yrsu Sigurðardóttur, gegnir hús á Hesteyri á norðanverðum Vestfjörðum stóru hlutverki. Húsið er þó alls ekki á Hesteyri, heldur stendur það við Víkurbraut 4 í Grindavík og með aðstoð tölvutækninnar er það fært til Vestfjarða.

Húsið heitir Bakki og er í eigu Minja- og sögufélags Grindavíkur, en félagið eignaðist húsið í maí 2015 og hefur unnið að endurbyggingu þess. Ég man þig er að miklu leyti kvikmynduð í og við Bakka.

Bakki er forn verbúð, byggð 1933, og er talin vera elsta uppistandandi verbúð á Suðurnesjum. Vonir standa til að í framtíðinni muni Bakki hýsa byggðasafn Grindvíkinga og aðra menningartengda starfsemi.

Mýrargata-Eiðurinn

Pét­ur Ein­ars­son, fyrr­ver­andi for­stjóri Straums og þríþraut­arkappi, lánaði íbúð sína í miðbæ Reykjavíkur fyrir kvikmynd Baltasars Kormáks, Eiðurinn,

Pétur lánaði ekki bara íbúðina, heldur líka sjálfan sig, þar sem hann átti stórleik sem staðgengill Baltasars Kormáks þar sem hann synti og hjólaði af miklum krafti.

Í viðtali við Smartland árið 2016 sagði Pétur: „Ég er svo hepp­inn að eiga íbúð við höfn­ina með út­sýni sem passaði vel í mynd­ina og það var bara gam­an. En þetta var meira fyr­ir­tæki en við gerðum okk­ur grein fyr­ir og mikið af tækj­um og fólki í hús­inu í nokkra daga en allt gekk vel á end­an­um. Það var vissu­lega skrítið að sjá Gísla Örn og Heru reykja stór­ar jón­ur í sóf­an­um hjá mér en þau eru frá­bær­ir leik­ar­ar og íbúðin er flott­ari eft­ir tök­urn­ar. Það er mik­ill heiður að vera hluti af stærstu íslensku mynd­inni sem hef­ur verið gerð.“

 

Sumarbústaður Antons flugstjóra – Stella í orlofi

Einn þekktasti sumarbústaður landsins kom við sögu í Stellu í orlofi (1986), en Stella fékk hann lánaðan og fór með Salomon vin sinn þangað í afslöppun með kostulegum afleiðingum.
Sumarbústaðurinn, sem er í Norðurnesi í Kjós, var byggður árið 1978. Hann var settur á sölu í júlí 2017 og segir á heimasíðu fasteignasalans „mikil eftirspurn var eftir húsinu og fengu færri en vildu.“ Þegar kvikmyndin var tekin var lítill gróður við bústaðinn, sem hefur tekið ótrúlegum breytingum á þeim rúmu 30 árum sem liðin eru frá tökum myndarinnar.

Högnuhús – Eiðurinn

Baltasar Kormákur valdi eitt þekktasta og fallegasta einbýlishús landsins, sem heimili fjölskyldu persónu hans í Eiðinum; Bakkaflöt 1 í Garðabæ, sem teiknað var af arkitektinum Högnu Sigurðardóttur árið 1965.

Húsið ber sterk höf­und­ar­ein­kenni en í verk­um sín­um lagði Högna áherslu á tengsl bygg­ing­ar við nátt­úr­una.

Högna var fædd árið 1929 og var fyrst Íslendinga til að læra við École des Beaux-Arts í París, þaðan sem hún útskrifaðist árið 1960.

Fyrsta húsið sem byggt var samkvæmt hönnun Högnu var ein­býl­is­hús í Vest­manna­eyj­um, við Bú­astaðabraut 11. Það skemmd­ist í Heima­eyj­argos­inu árið 1973 og er Brekku­gerðið því elsta stand­andi verk henn­ar.

Ásvallagata 8 – Húsið

Einbýlishúsið var skærasta stjarnan í kvikmyndinni Húsið – Trúnaðarmál sem leikstýrt var af Agli Eðvarðssyni. Kvikmyndin var gefin út árið 1983 og er fyrst íslenskra hrollvekja í flokki svonefndra „geiramynda“. Hrollur myndarinnar byggist á dulmögnuðu andrúmslofti, flöktandi skuggum og undarlegum draumum.

Húsið, sem var byggt árið 1926, er stórt og reisulegt, um 300 fermetrar og  hvítt að lit. „Þarna var mjög laglegt hús sem við gerðum ljótt,“ segir Egill um húsið við Ásvallagötu. „Eigendurnir leyfðu okkur að mála tvær hliðar upp á nýtt. Það stóð þarna hvítt og fínt en við vildum hafa það grátt og ljótt.“

Jóhann Páll Valdimarsson, sem stýrði Forlaginu og JPV í fjölda ára, og eiginkona hans, Guðrún Sigfúsdóttir, áttu húsið og lánuðu hópnum heimilið á meðan þau fóru í frí til Bandaríkjanna. „Konan mín hefur alltaf talað um að það væru vondir andar í húsinu en ég reyni að leiða drauga hjá mér,“ segir hann og bætir við að Egill og félagar hafi hrifist svo mikið af húsinu á sínum tíma að annað kom ekki til greina en að nota það fyrir kvikmyndina, en sögusagnir um draugagang hefðu ekki sakað hvað andrúmsloftið áhrærði.

 

Ragna Gestsdóttir
Ragna Gestsdóttir er umsjónarmaður Fókus á DV. Hún hefur starfað hjá DV síðan 2014 og vann einnig á Séð og Heyrt 2016.
Ragna skrifar almennar fréttir, viðtöl, greinar um menningu, viðburði, fólk og fleira.
Hún er forvitin um menn, málefni og menningu og með minni á við bestu leitarvél.
Netfang: ragna@dv.is.
Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Fókus
Í gær

Steingeitin – Agi, metnaður og vinnuharka

Steingeitin – Agi, metnaður og vinnuharka
Fókus
Í gær

Jensína náði ótrúlegum áfanga í dag – Elst allra sem hafa átt heima á Íslandi

Jensína náði ótrúlegum áfanga í dag – Elst allra sem hafa átt heima á Íslandi
Fókus
Fyrir 2 dögum

Netflix kaupir dreifingarréttinn á Rétti í Þýskalandi, Frakklandi, Ítalíu, Spáni og Suður Ameríku

Netflix kaupir dreifingarréttinn á Rétti í Þýskalandi, Frakklandi, Ítalíu, Spáni og Suður Ameríku
Fókus
Fyrir 2 dögum

Simmi kveður – „Það er gaman að skila góðu búi af sér“

Simmi kveður – „Það er gaman að skila góðu búi af sér“
Fókus
Fyrir 3 dögum

Heimir Karls – „Framvegis ætla ég að faðma fólk eða „olnboga“

Heimir Karls – „Framvegis ætla ég að faðma fólk eða „olnboga“
Fókus
Fyrir 3 dögum

Ótrúleg breyting á Röggu nagla: Birti mynd af sér fyrir 10 árum – Sjáðu muninn

Ótrúleg breyting á Röggu nagla: Birti mynd af sér fyrir 10 árum – Sjáðu muninn