Pilturinn er aðeins 14 ára og ætti að vera í skóla en þess í stað var hann handtekinn í stórri lögregluaðgerð anýleg, grunaður um að vera hryðjuverkamaður. Hann og þýskir vinir hans, einnig á unglingsaldri, voru með stórar aðgerðir í huga. Þeir ætluðu að ráðast á hús þar sem hælisleitendur búa.
Þeir höfðu gengið til liðs við þýska nýnasistahópinn „Síðasta varnarlínan“ sem segist vilja „verja þýsku þjóðina.
Fyrrgreindur hópur unglingspilta var stofnaður á síðasta ári og eru félagarnir í honum allir á unglingsaldri. Þeir spjalla saman á spjallrásum öfgasinna og yfirvöld hafa miklar áhyggjur af þróun mála.
Þetta er hluti af óhugnanlegri þróun í Evrópu þar sem hryðjuverkamenn verða sífellt yngri.
Peter Neumann, prófessor í öryggisfræðum við King‘s College í Lundúnum, tók saman fjölda ákærðra íslamskra öfgasinna í Evrópu 10 mánuðum eftir að stríðið á Gasa hófst, brá honum mjög. 58 höfðu verið ákærðir og þar af var þriðjungurinn á aldrinum 13 til 19 ára.
Hann kallar þetta „TikTok-vígamenn“ í rannsókn sem hann gerði en í henni fjallar hann um hversu hratt þessi ungmenni hneigjast til öfgahyggju. Þetta fer fram á samfélagsmiðlum á borð við TikTok og Instagram.
Í Bretlandi er nær fimmtungur allra, sem eru grunaðir um hryðjuverkastarfsemi, yngri en 18 ára.
Wall Street Journal segir að í þriðjungi allra hryðjuverkamála í Belgíu frá 2022 til 2024 hafi börn og ungmenni komið við sögu.
