Ástæðan er sú að Adriana gengur með barni og er komin um 23 vikur á leið.
Ströng þungunarrofslöggjöf er í gildi á heimaslóðum Adriönu í Georgíu í Bandaríkjunum. Hún dvelur á Northside-sjúkrahúsinu í Atlanta og segja læknar að Adriönu verði haldið á lífi þar til fóstrið verður orðið nógu þroskað til að hægt sé að taka það með keisaraskurði. Þykir líklegt að það verði í ágúst.
Aðstandendur Adriönu eru ekki sáttir við þetta og vilja fá að ráða því sjálfir hvenær Adriana deyr.
Þrjú ár eru síðan ný lög tóku gildi í ríkinu sem banna þungunarrof ef viðkomandi er gengin sex vikur. Lögin ganga undir nafninu „hjartsláttarlög“ en eins og nafnið gefur til kynna kveður það á um að þungunarrof er bannað um leið og hjartsláttur finnst.
Adriönu hefur verið haldið á lífi í öndunarvél síðan í febrúar síðastliðnum. Hún leitaði til lækna vegna mikilla höfuðverkja en var send heim með verkjalyf. Daginn eftir vaknaði sambýlismaður hennar einn morguninn og sá að Adriana átti í erfiðleikum með andardrátt. Hann hringdi í snatri eftir sjúkrabíl og á sjúkrahúsinu kom í ljós að hún var með blóðtappa í heila.
Læknum tókst ekki að koma í veg fyrir að drep komst í mikilvægar heilastöðvar og er Adriana heiladauð.
Sem fyrr segir er hún komin um 23 vikur á leið og hafa rannsóknir á fóstrinu sýnt að það er með vatnshöfuð og alls óvíst hvernig líf þess verður nái það að lifa.
Aðstandendur Adriönu eru nú í baráttu við heilbrigðisyfirvöld í Georgíu um að fá að ráða því hvenær hún deyr. Móðir hennar segir við bandaríska fjölmiðla að hún sé ekki búin að gera upp við sig hvort hún vilji að slökkt verði á öndunarvélinni en hún er ósátt við að sjúkrahúsið hafi tekið þessi völd af fjölskyldunni.
„Þetta er algjör pynting fyrir mig. Ég sé dóttur mína anda með hjálp öndunarvélarinnar en hún er ekki þarna,“ segir hún við 11Alive-sjónvarpsstöðina. Hún segir að fjölskyldan hafi ákveðið að gefa drengnum sem Adriana gengur með nafnið Chance. Bendir hún á að óvíst sé hvernig líf hans verður nái hann að þrauka næstu vikurnar.
„Hann gæti orðið blindur, það er möguleiki á að hann geti ekki gengið og það eru líka líkur á að hann muni ekki lifa af eftir að hann fæðist,” segir hún.
Steven Ralston, yfirmaður fósturlækningadeildar við George Washington-háskóla, segir við fjölmiðla að líkurnar á að heilbrigt barn fæðist í lok þessa ferlis séu mjög, mjög litlar. Líkami Adriönu muni sennilega gefa sig áður en áður en fóstrið verður nógu þroskað til að hægt sé að taka það með keisaraskurði.
