Í viðtali við The Independent í vikunni greindi bandaríska tónlistarkonan Dolly Parton frá því að eiginmaður hennar hafi glímt við langvarandi heilsuleysi, sem þau greindu aldrei frá opinberlega.

Carl Dean lést í mars, 82 ára að aldri. 

„Ég finn virkilega fyrir nærveru hans. Ég reyni bara að halda áfram, því ég veit að ég verð að gera það. Hluti af mér öðlaðist frið við það að hann fékk frið og þjáðist ekki lengur. En það bætir samt ekki upp missinn og einmanaleikann.“

Söngkonan ætlar að heiðra minningu eiginmannsins á sama tíma og hún er að reyna að halda áfram með líf sitt.

„Svo þegar ég missti hann hugsaði ég bara: „Jæja, ég ætla að taka alla þessa orku, og ég ætla bara að setja hana aftur í aðra hluti, og ég mun halda honum alltaf til staðar í öllu sem ég geri.“ 

Hún hugsaði líka um hversu „stoltur“ Dean var alltaf af tónlistarferli hennar. „Maðurinn minn sagði alltaf: „Ef einhver fæddist einhvern tímann til að verða stjarna, þá ert það þú,“ sagði hún. „Vegna þess að hann sér mig elska að gera alla hlutina og leika og svoleiðis. Mér finnst það allt mjög skemmtilegt, en ég tek það mjög alvarlega líka.“

Parton er fullviss um að hún muni hitta Dean aftur.  „Ég er trúuð manneskja og ég trúi því sannarlega að ég eigi eftir að hitta hann aftur einhvern daginn,“ sagði hún við Associated Press í mars.

„Ég og Carl eyddum mörgum yndislegum árum saman. Orð geta ekki útskýrt ástina sem við áttum í meira en 60 ár. Þakka ykkur öllum fyrir samhug ykkar og bænir,“ sagði Dolly í tilkynningu eftir andlát Dean. 

Hjónin kynntust árið 1964 fyrir utan þvottahús þegar Dolly var aðeins 18 ára og nýkomin til Nashville til að láta drauminn um tónlistarferil rætast. Þau giftu sig tveimur árum síðar. Hjónin héldu sambandi fyrir utan sviðsljósið og sást Dean einstaka sinnum opinberlega með eiginkonu sinni. 

„Við erum virkilega stolt af hjónabandi okkar,“ sagði Dolly árið 2011. „Þetta er það fyrsta fyrir okkur bæði og það síðasta.“

Dean gaf einnig sjaldgæfa yfirlýsingu um ást þeirra í viðtali við Entertainment Tonight árið 2016.

„Fyrsta hugsun mín var: „Ég ætla að giftast þessari stelpu.“ Seinni hugsun mín var: „Drottinn, hún lítur vel út“.“ Og það var dagurinn sem líf mitt hófst,“ sagði hann. „Ég myndi ekki skipta síðustu 50 árum fyrir neitt annað.“