The Guardian skýrir frá þessu og segir að sérfræðingar hafi í gegnum tíðina varað við félagslegri og sálfræðilegri hættu sem getur fylgt því að nota sæði sama sæðisgjafans til að búa til fjölda barna í mörgum löndum.
Mál fyrrgreinds sæðisgjafa vekur áhyggjur af því hversu flókið það er að rekja slóðina og finna svo margar fjölskyldur þegar alvarleg heilsufarsógn steðjar að. Börnin, sem voru búin til með sæði mannsins, fæddust á árunum 2008 til 2015.
Dr Edwige Kasper, líffræðingur við Rouen sjúkrahúsið í Frakklandi, skýrði frá málinu á árlegri ráðstefnu the European Society of Human Genetics í Mílanó nýlega. Hann sagði að það sé nauðsynlegt að setja evrópskt þak á hversu oft megi nota sæði úr sérhverjum sæðisgjafa.
Málið kom upp þegar tvær fjölskyldur, sem engin tengsl voru á milli, höfðu samband við frjósemisstofuna, sem þær höfðu nýtt sér, þegar börnin þeirra höfðu greinst með krabbamein sem var talið tengjast sjaldgæfu arfgengu genaafbrigði. Sæðisbankinn, The European Sperm Bank, sem hafði útvegað sæðið, staðfesti að afbrigðið hefði fundist í hluta af sæði sæðisgjafans.
Þegar hann gaf sæði árið 2008 var ekki vitað að þetta afbrigði tengdist krabbameini. Sæðisgjafinn er sagður við góða heilsu.
