Gervigreindin gefur og gervigreindin tekur, en það er líklega ágætisráð að stóla ekki um of á hana. Karlmaður steig fram í morgunþætti á Grikklandi á dögunum og greindi frá því að gervigreindin ChatGPT hefði heldur betur leikið hann grátt, svo grátt að nú er hjónabandi hans lokið. Hvers vegna? Því eiginkona hans fékk þá sniðugu hugmynd að biðja ChatGPT að lesa í kaffibolla hjónanna.
„Ég hló bara því ég hélt hún væri að grínast. En hún var ekki að því. Hún sagði mér að koma mér út, dagði börnunum frá skilnaðinum og áður en ég vissi fékk ég símtal frá lögmanni hennar.“
Eiginkonan bað ChatGPT að lesa í kaffikorg eiginmannsins og sendi gervigreindinni mynd. ChatGPT sagði að samkvæmt kaffikorginum væri eiginmaðurinn að láta sig dreyma um að halda framhjá honu sinni með yngri konu. Nafn þessarar hjákonu átti að byrja á E og væru það hreinlega örlög eiginmannsins að hefja samband við þesas konu.
Þá sendi eiginkonan inn mynd af sínum eigin kaffibolla og gervigreindin hélt áfram – það væri nú ljóst að eiginmaðurinn væri þegar byrjaður að hitta þessa konu og það sem meira var – viðhaldið ætlaði sér að rústa fjölskyldunni.
Eiginmaðurinn neitaði að samþykkja skilnaðinn svo honum var stefnt í skilnaðarmáli nokkrum dögum síðar. Lögmaður hans er að mótmæla kröfunni með þeim rökum að fullyrðingar frá gervigreind hafi ekkert gildi í dómsmáli, hvað þá þegar fullyrðingarnar byggja á bollalestri. Eiginmaðurinn tók fram að hans fyrrverandi hefði áður tekið fullmikið mark á spádómum. Hún hafi hitt stjörnuspeking fyrir nokkrum árum og tók það hana heilt ár að átta sig á því að ekkert af því sem spekingurinn sagði stóðst skoðun.
