Talið er að þetta sé fyrsta handtakan í ríkinu eftir að umdeild lög tóku gildi árið 2023 sem banna trans fólki að nota almenningssalerni í ríkisreknum byggingum sem samræmast ekki kyni þeirra við fæðingu.
Sambærileg lög eru í gildi í fleiri ríkjum, þar á meðal Wyoming, Utah, Montana og Suður-Dakóta. Háttsemin er þó aðeins refsiverð í Flórída og Utah.
Marcy var handtekin þann 19. mars síðastliðinn og gæti hún átt yfir höfði sér 60 daga fangelsi.
Marcy var meðvituð um það að hún væri að brjóta lögin þegar hún gekk inn í bygginguna í Tallahassee. Verðir í byggingunni vissu af komu hennar og sögðu að hún fengi viðvörun ef hún færi inn á kvennasalerni byggingarinnar. Marcy lét þá viðvörun sem vind um eyru þjóta, fór inn og þvoði á sér hendurnar.
Í frétt AP kemur fram að hún hafi svo verið handtekin þegar hún neitaði að yfirgefa salernið.
„Ég vildi bara að fólk myndi sjá hversu biluð þessi lög eru,“ segir hún í samtali við AP. „Ef ég er glæpamaður, þá verður erfitt fyrir mig að lifa venjulegu lífi, allt vegna þess að ég þvoði á mér hendurnar. Það er klikkun,“ segir hún.
