Hjónin Radu og Angela Stefan, sem búsett eru í Las Vegas í Bandaríkjunum, voru að keyra Teslubifreið sinni eftir Deer Creek veginum á Charlestonfjalli þann 7. júlí þegar þau lentu í árekstri. Jeppi sem kemur keyrandi niður fjallið skellur framan á bifreið þeirra.

„Þetta var eins og hryllingsmynd,“ sagði Radu í samtali við KSNV. „Við vorum bara skelfingu lostin. Bara í áfalli.“

Í kjölfarið missti Radu algjörlega stjórn á bílnum og í myndbandinu má sjá bifreiðina keyra áfram, snúast í hringi og vera nálægt því að keyra fram af fjallsbrúninni. „Við misstum stjórn á bílnum,“ sagði Radu. „Bíllinn fór í átt að fjallinu og ég gat varla stöðvað hann á tímapunkti.“

Ekki bætti úr skák þegar hjónin sáu að ökumaðurinn sem keyrt hafði á þau stakk af frá vettvangi og skildi þau eftir, en þau náðu ekki símasambandi. „Við sáum í baksýnisspeglinum fólkið sem keyrði á okkur, það bara keyrði í burtu.“

Aðrir ökumenn stöðvuðu þó til að aðstoða hjónin og hringja á landverði til aðstoðar.

Hjónin standa nú frammi fyrir gríðarlegum viðgerðarkostnaði upp á 20 þúsund dali og tryggingafélagið neitar að borga þeim krónu. Þau leita því að ökumanninum sem keyrði á þau til að borga brúsann. Fylkislögreglan í Nevada rannsakar málið en hefur enn ekki borið kennsl á ökumanninn sem ók af vettvangi. Þangað til stendur Teslabifreiðin skemmd í innkeyrslunni hjá hjónunum.

Í frétt DailyMail um málið segir að rannsókn bandarískra eftirlitsaðila sem hófst í ágúst árið 2021 hafi leitt í ljós að sjálfsstýring Teslubifreiða hafi verið orsök í að minnsta kosti 13 banaslysum. Óljóst er hvort Radu hafi notað sjálfstýringuna þegar áreksturinn varð.