Fasteignasala í Ástralíu hefur verið dæmd til að greiða sem nemur 75 milljónum króna vegna eldsvoða sem varð í húsi í einu dýrasta hverfi Sydney árið 2019.

Þannig er mál með vexti að fasteignasali á umræddri fasteignasölu, Julie Bundock, var að undirbúa opið hús þegar hún kveikti óvart í húsinu.

Julie tók eftir því að eigendur hússins höfðu gleymt því að ganga frá rúmfötum sem þau höfðu hengt upp til þerris. Tók hún rúmfötin og skellti þeim í hillu í herbergi á neðri hæðinni, beint fyrir neðan ljós sem hún síðan kveikti á.

Um tuttugu mínútum síðar var mikill eldur kominn upp í húsinu og leiddi rannsókn lögreglu í ljós að eldsupptökin höfðu verið í umræddum rúmfötum sem voru nánast í beinni snertingu við sjóðheita ljósaperuna.

Það er skemmst frá því að segja að húsið, sem metið var á 270 milljónir króna, gjöreyðilagðist í eldsvoðanum. Eigandi hússins, Peter Alan Bush, stefndi fasteignasölunni vegna málsins sem og fjórir leigjendur sem misstu innbú sitt í eldsvoðanum.

Fyrir dómi sagði Peter að Julie hefði hringt í hann skömmu eftir að eldurinn kom upp og sagt: „Guð minn góður, Pete. Ég held ég hafi kveikt í húsinu þínu.“

Dómari sagði að Julie hefði átt að vita betur þegar hún setti rúmfötin beint undir ljósið og mat það sem svo að hún – eða fasteignasalan sem hún starfaði fyrir – bæri að hluta til ábyrgð á því hvernig fór.