Dómstóll í Bretlandi dæmdi á dögunum hina 83 ára gömlu Tabitha Richardson í tæplega tveggja ára skilorðsbundið fangelsi og til að endurgreiða um 170 þúsund pund, eða um 30 milljónir króna, til einstaklings sem sló hana um lán og var krafinn um 40% okurvexti. Í dómnum kom fram að Richardson, sem virkaði sem ósköp venjuleg amma, hefði lánað sjö einstaklingum háar fjárhæðir á síðustu árum en krafið þá um svívirðilega vexti sem voru andstætt lögum og reglum.

Þá hafi Richardson verið sérstaklega ágeng og ógnandi við lánþega sína og meðal annars sent þeim skilaboð á borð við: „Hringdu nú þegar, þú veist að ég finn þig“ samkvæmt umfjöllun Daily Mail.

Muni Richardson ekki greiða hina himinháu sekt mun hún þurfa að dúsa í fangelsi í tæp tvö ár.

Richardson, sem vann hjá lánafyrirtæki lengi og þekkti bransann út og inn, kvaðst sjá eftir gjörðum sínum en tilgangurinn hafi verið að hjálpa fólki sem átti erfitt með að fá aðgang að fjármagni.

Málið hefur vakið nokkra athygli í Bretlandi enda uppfyllir Richardson ekki beint staðalímyndir um okurlánara.