Á fimmtudaginn handtók lögreglan í New York hinn 48 ára gamla Sheldon Johnson grunaðan um morð. Tveimur dögum áður hafði lögreglan fundið lík hins 44 ára Collin Small. Málið hefur vakið töluverða athygli því Johnson hefur verið ötull talsmaður þess að endurbætur verði gerðar á bandaríska réttarvörslukerfinu.

Höfuðlaust lík Small fannst í íbúð í Bronx að sögn NBC. Nágrannar höfðu heyrt skothvelli koma frá íbúð hans og sáu mann, sem var með hreingerningarbúnað, yfirgefa bygginguna.

ABC segir að við leit lögreglunnar í íbúðinni hafi hún fundið höfuð og fætur Small í frystinum.

Johnson þekkir væntanlega ágætlega til réttarvörslukerfisins því hann afplánaði 25 ára dóm fyrir morðtilraun.

Johnson, sem var áður meðlimur í glæpagenginu Blood, hefur rætt opinberlega um hvernig hann breytti lífi sínu til hins betra á meðan hann sat í fangelsi. Eftir að hann var látinn laus starfaði hann sem ráðgjafi fyrir Queens Defenders, sem eru samtök verjenda í sakamálum, að sögn The Times.

Johnson er í haldi, grunaður um morð, vörslu skotvopns, að hafa falið lík og að hafa reynt að leyna sönnunargögnum. Hann hefur lýst yfir sakleysi sínu.