Franski rapparinn Mohamed Sylla, betur þekktur sem MHD, var á laugardaginn dæmdur í 12 ára fangelsi fyrir morð í París 2018. Morðið tengdist átökum glæpagengja.

Sylla var ákærður ásamt átta öðrum. Fimm þeirra voru sakfelldir og dæmdir í 10 til 18 ára fangelsi. Þrír voru sýknaðir.

AFP segir að Sylla hafi haldið fram sakleysi sínu þegar hann flutti lokaávarp sitt áður en kviðdómendur drógu sig í hlé til að komast að niðurstöðu.

„Allt frá upphafi hef ég haldið fast í sakleysi mitt og ég mun halda því áfram,“ sagði Sylla við viðstadda í þéttsetnum dómsalnum í París.

Saksóknarinn krafðist 18 ára fangelsis yfir Sylla. Allir hinir ákærðu héldu fram sakleysi sínu. Ekki liggur fyrir hvort einhver þeirra eða ákæruvaldið muni áfrýja dómnum.

Morðið var framið í tíunda hverfinu í París 2018 og var tekið upp á myndband af manneskju sem stóð við gluggann heima hjá sér. Mercedez bifreið var ekið á fórnarlambið og síðan umkringdu 12 manns fórnarlambið og börðu og stungu með hníf. Fljótlega kom í ljós að Mercedez bifreiðin var í eigu Sylla.

Vitni báru auk þess kennsl á hann vegna aflitaðs hárs hans og Puma-bols sem hann var í. Hann var með auglýsingasamning við Puma á þessum tíma.