Álftin, sem hét Faye, var vel þekkt í þorpinu. Hún hvarf nýlega ásamt fjórum ungum sínum að sögn Sky News. Fjölskyldan hélt til á tjörn í Manlius.
Lögreglan hóf rannsókn á hvarfi fuglanna eftir að henni barst tilkynning um það. Henni barst síðan ábending um að tveir álftarungar væru í verslun í bænum Salina.
Unglingur, sem starfaði í versluninni, játaði að hafa tekið þátt í því að stela álftunum ásamt tveimur öðrum unglingum.
Hinir tveir ungarnir fundust á heimili í Syracuse að sögn lögreglunnar. En Faye fannst ekki því unglingarnir höfðu drepið hana, eldað og borðað.
Manny, maki Faye, hefur verið við tjörnina frá því að Faye og ungarnir voru teknir.
Unglingarnir eiga ákæru yfir höfði sér fyrir að hafa stolið álftunum, drepið Faye og farið illa með fuglana.
Talsmaður lögreglunnar sagði að hugsað verði um ungana og þeim síðan sleppt við tjörnina eftir nokkrar vikur þegar þeir hafa náð þeim aldri að geta bjargað sér sjálfir.
Faye og Manny höfðu haldið sig á tjörninni í Manlius í rúman áratug og komið ungum á legg á hverju ári.