„Hann kunni stafrófið, tölur, liti, form og 20 orð þegar hann var eins árs. Hann var litli nördinn okkar og við elskuðum hann vegna þess,“ skrifaði móðir hans, Amber Shoemake, á samfélagsmiðla að sögn Newsner.
Því miður veiktist Leland skyndilega árið 2015. Hann var lagður inn á sjúkrahús en ástand hans versnaði hratt. Læknar komust fljótlega að því að hann var með heilabólgu af völdum amöbu.
Enginn veit hvernig amaban komst í heila hans en talið er hugsanlegt að hann hafi komist í snertingu við hana þegar hann var að leik utanhúss. „Það sem hann elskaði mest var að leika sér úti. Ég hafði aldrei ímyndað mér að þetta myndi taka hann frá mér,“ skrifaði móðir hans einnig.
Leland var með mikinn höfuðverk, hita, uppköst, niðurgang, svima og augun voru til vandræða. Hann gat ekki fókusað á hluti án þess að augun hreyfðust og hann sæi tvöfalt skrifaði móðir hans þegar efnt var til fjársöfnunar fyrir Leland.
Hann barðist fyrir lífi sínu en því miður gátu læknar ekki gert neitt og þann 25. september 2015 kvaddi hann þennan heim.
Þegar foreldrar hans komu heim fljótlega eftir andlátið helltist sorgin yfir þau. En mitt í hinni yfirþyrmandi sorg sáu þau svolítið á sófaborðinu.
Allt sitt stutta líf hafði Leland haft fyrir vana að skilja eftir bréf og teikningar handa foreldrum sínum. Það hafði hann einmitt gert, skilið eftir síðustu skilaboðin til þeirra.
„Ég er enn hjá ykkur. Takk, mamma og pabbi. Ást,“ hafði hann skrifað til þeirra.
Hann hafði einnig teiknað rautt hjarta og skrifað mamma, pabbi og ást inn í það.
Amber sagði að bréfið hafi verið áminning um þá ást sem þau deildu og hafi verið þeim örlítil huggun á þessum erfiða tíma. „Við höfum ekki hugmynd um hvenær hann skrifaði þetta. En eins og þú sérð, þá var hann alltaf sérstakt barn,“ sagði hún.