Þegar Elísabet fór í opinbera heimsókn til Bandaríkjanna 1983 hafði alríkislögreglan FBI áhyggjur af lífi hennar og öryggi.
Þetta kemur fram í skýrslu sem var birt nýlega. Í henni kemur fram að Írski lýðveldisherinn, IRA, hafi haft í hótunum um að myrða drottninguna. BBC skýrir frá þessu.
FBI kom að öryggisgæslu í kringum drottninguna á meðan á heimsókn hennar stóð og komst þá að fyrirætlunum IRA um að myrða hana.
Það var lögreglumaður frá San Fransisco sem gerði FBI viðvart um þessa ógn. Hann sótti oft írskan bar í borginni og þar heyrði hann ávinning af morðáætluninni. Að sögn var um mann að ræða sem vildi ná fram hefndum í kjölfar þess að dóttir hans var drepin á Norður-Írlandi.
„Hann vildi reyna að skaða drottninguna og ætlaði að gera það með því að kasta hlut niður af Golden Gate Bridge þegar konunglega snekkjan Britannia sigldi þar undir eða með því að reyna að drepa Elísabetu drottningu þegar hún heimsótti Yosemite þjóðgarðinn,“ segir í skýrslu FBI að sögn BBC.
Ekkert kemur fram í skýrslunni um hvort einhver hafi verið handtekinn vegna málsins eða hvað var gert til að vernda drottninguna fyrir þessari hugsanlegu ógn.