Judy, sem var 31 árs tveggja barna móðir, lést í júní 2017. Hún hafði þá legið á sjúkrahúsi í tvö ár eftir að fyrrum unnusti hennar, Michael Slager, hellti bensíni yfir hana og kveikti í henni við bensínstöð. Þetta gerði hann eftir að þau höfðu rifist.
Fjallað er um mál Judy í nýrri heimildarmynd MTV sjónvarpsstöðvarinnar „The Fire That Took Her“.
Judy var endurlífguð sjö sinnum og þurfti að gangast undir rúmlega 50 aðgerðir til að hægt væri að halda henni á lífi. Hún hlaut brunasár á 90% líkamans.
Michael var aðeins dæmdur í 11 ára fangelsi eftir að hann játaði að hafa kveikt í henni. Dómurinn varð hvatning fyrir Judy til að halda fast í lífið til að tryggja að rödd hennar myndi heyrast.
„Mamma, það á ekki einu sinni að bera eld að maur. Ég fékk ævilangan dóm en hann ekki,“ sagði móðir hennar, Bonnie, í samtali við People.
Skömmu fyrir andlátið eyddi Judy vikum í að venja sig af verkjalyfjum til að ná því stigi að hún gæti sannfært dómara um að hún væri með skýra hugsun. Þegar þessum áfanga var náð bar hún vitni í þrjár klukkustundir gegn Michael. Hún sagði hann hafa hunsað hjálparbeiðni hennar eftir að hann kveikti í henni. „Hann var illmennskan sjálf á svipinn,“ sagði hún meðal annars.
Vitnisburður hennar var tekinn upp á myndband sem var síðar leikið fyrir dómi.
Michael var ákærður á nýjan leik 2018 og þá fyrir morð. Hann var dæmdur í ævilangt fangelsi á grundvelli framburðar Judy. Þetta var í fyrsta sinn í sögunni sem fórnarlamb bar vitni í eigin morðmáli.