Hugsanlega voru það gríðarlegir sólstormar og sólblossar frá ungri sólinni sem færðu jörðinni þau efni sem þurfti til að líf gæti myndast.

Þetta eru niðurstöður nýrrar rannsóknar að sögn Live Science. Fram kemur að með því að skjóta ögnum, sem eru í sólvindi, á blöndu gastegunda, sem eru í andrúmslofti jarðarinnar, hafi vísindamönnum tekist að mynda töluvert magn amínósýra og korboxylsýru en þetta eru nauðsynlegir hornsteinar prótína og alls lífræns efnis.

Rannsóknin var birt í vísindaritinu Life í apríl. Vísindamennirnir notuðu öreindahraðal til að komast að því að geislar frá ofurblossum sólarinnar gætu hafa fært jörðinni þau efni sem þurfti til að líf gæti myndast.

Kensei Kobayashi, prófessor í efnafræði við Yokohama National háskólann í Japan og aðalhöfundur rannsóknarinnar, sagði í tilkynningu að flestir vísindamenn forðist geimgeisla því það þurfi sérhæfðan búnað, eins og öreindahraðal, til þeirra rannsókna. Hann hafi verið svo heppinn að hafa aðgang að nokkrum.