Þetta hljómar hugsanlega eins og söguþráður úr einum þætti sjónvarpsþáttaraðarinnar Breaking Bad en svo er ekki, þetta er rammasta alvara. 30 tonn af ammoníumnítrati hurfu úr lest sem flutti efnið, og fleira, frá Wyoming til Kaliforníu.

Ammóníumnítrat er hættulegt efni í röngum höndum því það er hægt að nota það til að búa til sprengjur en almennt er það notað sem áburður.

Samkvæmt frétt Gizmodo þá hurfu tonnin 30 þegar lestinni var ekið um Mojaveeyðimörkina í suðurhluta Kaliforníu.

Það gerir málið enn undarlegra að innsiglið á lestarvagninum, sem efnið var í, var órofið þegar lestin kom á áfangastað. Dyno Nobel, sem er fyrirtækið sem sá um flutninginn, hefur beðið The Nuclear Regulatory Commission um að rannsaka málið en eitt af hlutverkum stofnunarinnar er að tryggja að geislavirk efni og önnur hættuleg efni séu notuð á öruggan og löglegan hátt.