Starfsmaður í tæknideild fyrirtækisins essDOCS í London kærði yfirmann sinn fyrir kynferðislega áreitni. Taldi hún áreitnina felast í notkun yfirmannsins á tilteknum stöfum og spurningarmerkjum.
Starfsmaðurinn, Karina Gasparova, taldi yfirmann sinn, Alexander Goulandris hafa reynt við hana þegar hann sendi henni vinnupóst þar sem hann bað hana að skýra mál sitt út nánar. Fremur en að orða það beint hafði Alexander gert merkingar í póstinn þar sem hann skrifaði ýmist „XX“, „YY“ eða „????“. Taldi Karina ljóst að með þessum stofum og merkjum væri Alexander að biðja hana um að stunda með sér kynlíf.
Hélt hún því líka fram að Alexander hefði verið óviðeigandi þegar hann endurskírði vinnuskjal með stöfunum „AJG„ en Karina taldi ljóst að þessi skammstöfun ætti að standa fyrir „A Jumbo Genital“ eða risagöndull. Rétt er að geta þess að skammstöfum á nafni Alexanders eru einmitt AJG.
Málið var tekið fyrir í úrskurðarnefnd í vinnuréttarmálum í London, en þar töldu menn að Karina hefði fremur brenglaða sýn á málum og var kröfum hennar hafnað.
Karina hafði kært fyrirtækið fyrir kynferðislega áreitni, mismunun og ólögmæta uppsögn. Fyrir úrskurðarnefndinni lýsti Karina því að Alexander hefði reynt við hana með því að brydda upp á spjalli við hana „þegar þau ræddu viðskipti í vinnusímtölum“ og sagði Karina að hann hefði einnig starað á sig. Benti hún svo á áðurnefndan tölvupóst og sagði ljóst af lestri hans að þar væri Alexander að gefa eitthvað kynferðislegt í skyn.
Taldi Karina að notkun á XX gæfi til kynna kossa, YY gæfi til kynna kynferðislega athafnir og spurningarmerkin hefðu verið leið til að spyrja hvenær hún væri tilbúinn til að stunda kynlíf.
Úrskurðarnefndin benti þó á að tölvupósturinn hefði í raun falið í sér beiðni um upplýsingar þar sem Alexander hefði notað þessa starfi og merki til að tákna hluta texta sem hann vildi að Karina skýrði betur út. Ekki væri hægt að lesa neitt kynferðislegt úr þessum samskiptum.
Karina hélt því einnig fram að Alexander hefði áreitt sig með því að segja henni að eiga gott kvöld með tælandi röddu. Hann hefði svo viljandi snert á henni hendina þegar hann teygði sig eftir tölvumús.
Úrskurðarnefndin var þó ósammála.
Karina benti á að Alexander væri ríkur og valdamikill og að karlmaður í hans stöðu væri of snjall til að reyna við einhvern með augljósum hætti. Hún hefði fyrst lagt fram kvörtun í apríl 2021 en þegar hún var ekki tekin alvarlega hafi hún sagt starfi sínu lausu.
Úrskurðarnefndin taldi ekkert hæft í neinum af þeim ásökunum sem Karina bar á borð heldur virtist hún þvert á móti hafa tilhneigingu til að koma með galnar ásakanir án nokkurra sannana. Var kröfum hennar því vísað frá og þarf hún að greiða fyrrum vinnuveitanda sínum málskostnað.