Indónesískur dómstóll sýknaði nýlega tvo háttsetta lögreglumenn sem voru ákærðir fyrir vanrækslu í tengslum við harmleik á knattspyrnuleikvangi á síðasta ári. Þá létust 135 manns.

Ættingjar hinna látnu eru reiðir og hneykslaðir á niðurstöðu dómstólsins sem dæmdi þó einn lögreglumann í 18 mánaða fangelsi. Segja ættingjar hinna látnu að dómurinn yfir honum sé allt of vægur.

Lögreglunni hefur verið kennt um harmleikinn, sem átti sér stað í október á Kanjuruhan leikvanginum í Malang. Ástæðan er að lögreglan skaut táragasi á áhorfendur sem ruddust inn á völlinn eftir ósigur liðs þeirra gegn erkifjendunum.

Meðal hinna látnu voru 40 börn.

Margir ættingjar hinna látnu grétu þegar dómari las dómsniðurstöðuna upp í síðustu viku. Lögmaður einnar fjölskyldu sagði að réttlætið hefði ekki náð fram að ganga fyrir fjölskyldurnar. The Guardian skýrir frá þessu.