Tvær stúlkur, 12 og 13 ára, hafa játað að hafa stungið 12 ára stúlku til bana nærri bænum Freudenberg í Nordrhein-Westfalen á laugardaginn. Málið hefur að vonum vakið mikinn óhug í Þýskalandi.

Fórnarlambið, sem er nefnd Luise í þýskum fjölmiðlum, var hjá vinkonu sinni á laugardaginn. Þegar hún skilaði sér ekki heim tilkynntu foreldrar hennar lögreglunni um hvarf hennar og hófst mikil leit.

Luise fannst á sunnudaginn í skógi nærri heimili sínu. Hún var látin þegar að var komið. Maria Mannweiler, saksóknari, sagði á fréttamannafundi að hún hafi látist af völdum fjölda hnífstungna og blóðmissis vegna þeirra.

Hann sagði að stúlkurnar tvær hafi „tjáð sig um málið og að lokum játað að hafa myrt Luise“.

Hann veitti ekki frekari upplýsingar um málið og ræður aldur stúlknanna þar miklu því samkvæmt þýskum lögum eru þær ekki sakhæfar. Saknæmisaldur í Þýskalandi er 14 ár.

Lögreglan hefur ekki fundið morðvopnið eða morðvopnin.