The Washington Post skýrir frá þessu og segir að þetta flokkist sem fyrstu gráðu árás á opinberan starfsmann. LaGrone á allt að ævilangt fangelsi yfir höfði sér en getur sloppið með 25 ára dóm þar sem saksóknari hefur boðið honum að ef hann játar sök verði refsingin „aðeins“ 25 ára fangelsi.
People segir að þrír lögreglumenn hafi brugðist við útkalli þann 14. mars þar sem kvartað var undan manni með skotvopn. Samkvæmt ákæru þá er LaGrone sagður hafa „viljandi hótað lögreglumönnunum líkamsmeiðingum“ og hafi „notað eða sýnt banvænt vopn, skotvopn þegar hann réðst á þá“.
LaGrone og eiginkona hans, þá unnusta, Madelaine Brockway komust í fréttirnar þegar þau héldu „brúðkaup aldarinnar“ í París í Frakklandi. Það stóð yfir í fimm daga og kostaði að sögn bandarískra fjölmiðla 59 milljónir dollara en það svarar til um 8,2 milljarða íslenskra króna.
Eins og upphæðin segir til um, þá var ekkert til sparað við veisluhöldin. Brúðhjónin greiddu meðal annars gistingu gestanna í Versalahöllinni, máltíð á Chanel Haute Couture Suite og æfingamáltíð í óperuhúsinu í París. Þá spilaði hljómsveitin Maroon 5 í veislunni.
Á gjafalista brúðhjónanna var eitt og annað sem þau vanhagaði greinilega um og var verð gjafanna ansi ríflegt en það hljóp allt frá sem nemur nokkur hundruð þúsund íslenskum krónum upp í sem svarar til margra milljóna íslenskra króna.
