Í gær fundust kona og 8 ára dóttir hennar látnar í húsi í Vågsbygd í Kristiansand í suðurhluta Noregs. Lögreglan rannsakar málið sem morð en hefur ekki skýrt frá dánarorsök mæðgnanna. Fjöldi lögreglumanna vinnur að rannsókn málsins og vonast lögreglan til að geta haft uppi á morðingjanum eða morðingjunum fljótt.

Þetta kom fram á fréttamannafundi í gærkvöldi þar sem Cecilie Pedersen, yfirlögregluþjónn, skýrði frá málinu. Hún sagði að lögreglan telji að ekki sé útilokað að fleiri en einn hafi verið að verki.

Enginn hefur verið handtekinn vegna málsins og Pedersen vildi ekki svara hvort lögreglan hefði einhvern eða einhverja grunaða í málinu.

Það var manneskja, sem ætlaði að heimsækja íbúana í húsinu, sem fann mæðgurnar látnar upp úr hádegi í gær. Lögreglunni var tilkynnt um málið klukkan 13.21. Voru mæðgurnar látnar þegar fyrstu lögreglumenn komu á vettvang.

Lögreglan hefur unnið að vettvangsrannsókn síðan í gær og áfallahjálparteymi bæjarfélagsins hefur verið virkjað til að veita ættingjum, vinum og skólafélögum stúlkunnar alla nauðsynlega aðstoð.