Norskur maður, búsettur í Värmland í Svíþjóð, er grunaður um að hafa myrt sambýliskonu sína og að hafa síðan sett lík hennar í frystikistu. Nú hafa ný kæruatriði bæst við málið.

Aftonbladet skýrir frá þessu og segir að maðurinn sé nú grunaður um að umfangsmikil fjársvik sem stóðu yfir frá 12. janúar 2018 til 28. febrúar 2023.

Linda Karlsson, saksóknari, sagði í samtali við Aftonbladet að fjársvikin snúist um að maðurinn hafi orðið sér úti um aðgang að fjármálum hinnar látnu og þannig hafi hann getað tekið lífeyrisgreiðslur hennar og nýtt í eigin þágu. Brotið er talið gróft því um kerfisbundinn þjófnað var að ræða og upphæðin er há, eða sem svarar til um 19 milljóna íslenskra króna.

Hvað varðar það mat lögreglunnar að brotin hafi staðið yfir frá 12. janúar 2018 þá tengist það mati lögreglunnar á hvenær konan var myrt.

Sænska ríkisútvarpið segir að maðurinn hafi viðurkennt að hafa geymt líkið í frysti frá 2018.

Lögreglan hefur áður sagt að maðurinn hafi í upphafi viðurkennt að hafa orðið konunni að bana en síðan hafi hann breytt framburði sínum og þvertaki fyrir að hafa verið viðriðinn andlát hennar.